陳靜棄攻磚頭賺細路錢

藝人陳靜（DaDa）升呢老闆，與家姐夾份投資6位數字開拓童裝王國，問到為何不選擇買「磚頭」保本投資，她說：「嗰時籌備咗一、兩年，信心都幾大，相反買樓我就真係冇乜信心，因為之前見樓價係咁升嘅時候，都試過投資物業，嗰時轉手都賺到100萬，後來又買咗個細單位放租，但唔見賺得到，咁不如拎嚟做生意，我一向又對做生意好有興趣，當學吓嘢攞經驗！」

想開5間分店

因姪女「小饅頭」才萌生做童裝生意念頭的DaDa，被問到會否因生意問題而跟家姐發生拗撬，她說：「同屋企人還可以，反而同朋友就唔敢，而且我家姐係兩個小朋友嘅媽咪，所以我好尊重佢嘅意見！依家開咗一陣都叫賺得番，計劃緊喺九龍開多間分店，想開夠5間，創番個童裝王國！」但她強調不會放棄電影事業：「當然想兩邊都兼顧到，所以多數都係由家姐負責運作，我就飛去韓國嗰邊傾代理同採購。」

榮升老闆的DaDa野心勃勃，希望開設五間分店。

有Fans送上蛋糕，DaDa立即合埋眼許願生意興隆。

唔係學周秀娜

由模特兒榮升老闆，不少人認為DaDa的發展路向與「O靚模始祖」兼內衣店老闆周秀娜如出一轍，但DaDa並不認同：「佢賣內衣，我賣童裝都已經好唔同啦！同埋我知佢搞得好大，我就未有耐！（向佢取生意經？）冇呀！我同佢唔熟！」

至於感情生活，剛踏入27歲的DaDa自言現時事業心較重：「依家人大咗都睇化晒，唔想強求咁多，都係事業緊要，愛情放埋一邊先。」

文：專案組

攝：劉斌