車車獨遊墾丁搵「爸爸」

賽馬節目主持車車（張紫櫻）早前獨自到台灣墾丁旅行，朋友爭相為她介紹司機：「我請咗位當地人做司機，包車一日八個鐘，沿途有傾有講，仲請我食雞蛋冰，去到邊都有佢啲同學、朋友打招呼，令我覺得墾丁好有人情味，又好似跟住個爸爸周圍走咁，好有趣！」她最難忘沐浴時遇到不速之客：「旅行最驚嘅唔係鬼，係昆蟲！有晚我想泡泡浴，同隻四腳蛇對峙咗好耐，先夠膽趕走佢。」不過，墾丁的可愛動物亦令她很難忘：「我去咗餵梅花鹿，好似去咗日本奈良，同羊駝合照時，佢喺我耳仔邊講嘢，唔知係咪祝我生日快樂呢？」