嘉穎胸壓兼咀謝安琪 陳凱琳唔想搞大件事
鄭嘉穎、謝安琪（Kay）前晚於新劇中有胸壓戲份，今晚更有Kay主動吻嘉穎的一幕，二人的另一半大方表示有收看兼不介意，陳凱琳（Grace）認為介意就是小事化大，被問到會否約埋大家看Kay主動咀嘉穎的一幕時，她搞笑問：「約Kay定嘉穎先？」
藝人陳凱琳（Grace），陳嘉寶及賴慰玲昨日於紅磡出席《殭》的宣傳活動，此劇於網上有不少評論，成網民熱話，對於一些批評三女均力撐，特別是鄭嘉穎被指似元華，其女友Grace直指不似，更謂有話題代表有人追看。而前晚播映嘉穎因受傷暈倒而胸壓謝安琪（Kay）一幕，二人身貼身瞓於地上，Grace坦言自己有收看，更大方謂：「做戲啫！不嬲知佢哋有感情線，但真係唔介意，介意就小事化大啦！」說到今晚將播出Kay主動咀嘉穎的一幕，Grace被問會否相約收看時？她得戚問記者：「約Kay定嘉穎先？不過真係冇嘢！都唔使避開唔睇！」另外，有指嘉穎跟Grace改信基督教，Grace指嘉穎返教會已有一段時間，認為信仰不能逼，而嘉穎就對基督教了解當中。
張繼聰自認fans
至於Kay的老公張繼聰接受訪問時被問到胸壓這一場戲，他力撐謂：「我有睇，我覺得拍得好好，佢喺電影都有拍過，演員梗係要專業，我係佢fans，梗係支持佢。」更笑言自己就算附近沒有wifi，都要看直播。談到Kay被指演出太出力時，他認為這是合理的：「佢個角色要有變化，依家咁演先做到對比。」並指老婆沒有不開心。
叫嘉穎着比堅尼
此外，陳嘉寶於宣傳時坦言看不慣劇中的自己：「拍嗰陣係短頭髮，塊面又圓，畀屋企人話我似菜肉包！」至於收視好會如何慶祝？Grace即「交波」，叫陸永、黃又南穿比堅尼，賴慰玲則識做地謂：「不如叫嘉穎着比堅尼，可能好型！」
文：影視組