徐子珊瘦到走Bra怕醜唔畀攬

（陳永峯吉隆坡直擊）藝人徐子珊、唐詩詠、李思捷、丁悅及組合好德兄弟等，昨日在吉隆坡出席活動，而莊思明及范振鋒則擔任司儀。一身性感低V打扮的子珊獻唱期間，戰衣一度被風吹至走光露Bra邊，吸引男士上台獻花並要求抱抱，但被她請食「閉門羹」；反觀另一小花唐詩詠則有求必應，大方向男Fans送抱！

恨上真人騷玩到癲

子珊事後受訪時笑言最近清減不少，以致洩春光：「件衫冇危險，不過可能瘦咗，已經貼晒膠紙同做足安全措施！」提到獲異性要求抱抱，她直認尷尬，又笑言因怕醜而多數請異性「食檸檬」：「多謝佢送花，登台經常遇到呢啲情況，大家都好熱情。女仔抱抱就冇所謂，男仔通常都婉拒！」問到是否酬勞豐厚，她笑說：「我好平咋！依家忙緊喺內地宣傳《刑警兄弟》，套戲拍咗4年，好彩扮醜角，所以事隔幾年都唔覺大變化。」又笑言有意參與內地真人騷：「我想玩得癲啲，睇見真人騷好癲，可以寓工作於娛樂！」她坦言有接到邀約，但要慢慢揀：「我好怕蛇蟲鼠蟻！」

我就抱得啦！ 詩詠非常「順得人」，衣着性感仍任攬唔嬲。	子珊則尷尬派檸檬。	詩詠大方攬攬Fans。

同場的李思捷則發揮「扮嘢王」本色，模仿多位樂壇天王大唱經典金曲，炒熱氣氛！至於唱快歌的丁悅則自爆穿上不合Size的4吋高跟鞋上陣，擔心會仆親：「對鞋逼到隻腳好似鳳爪咁！」

文：影視組