蕭正楠手執「筍盤」 照捱飯盒
「翠如BB」搖身一變成為上市公司太子女，令男友蕭正楠頓成焦點，不少網友大讚蕭正楠「識揀」，而昨晚蕭正楠孭住一袋二袋兼一盒叉燒飯到電視城為劇集《幕後玩家》開工，對於被網友指他是「童話故事男主角」，蕭正楠無奈地說：「唔好講笑啦，早兩日（翠如）先提到呢件事，叫我一齊去支持佢爸爸，佢爸爸想邀請我去，我都唔知發生咩事，去到先知，當然戥世伯開心。」
昨翠如父親的股票大升，問蕭正楠有否買入？他說：「好少買股票，（翠如冇叫你內部認購？）完全冇提到！（股票大升，有冇怪翠如唔講呀？）我都冇買開，唔會在意。（會唔會叫翠如爸爸教做生意？）我都係做呢行拍戲、唱歌，冇諗過做其他工作。」
對網友亦指他是「十億駙馬」，蕭正楠耍手擰頭：「唔好咁講，呢啲係佢（指翠如）爸爸嘅努力，（翠如身份升呢，你會唔會好大壓力？）一樣咁生活，都係捱飯盒，我只係想多謝世伯，將其中一個女交畀我。（應承你哋結婚？）唔係，係畀咗一半我，畀我哋拍拖，（幾時要埋嗰一半，翠如係筍盤喎！）依家好忙冇太多時間，拍完呢部又即刻開第二部。」同場還有黃宗澤，在蕭正楠接受訪問時，已「搭訕」恭喜對方。