蔡一鳳200萬辣跑 盛品儒冇份揸
前亞視高層盛品儒的太太蔡一鳳性格豪爽，愛揸辣跑的她，新寵是市值逾200萬元的Aston Martin，男人愛車視如「老婆」，她待車如「閨蜜」，朋友開聲，名車可以任借，唯獨盛品儒被禁揸辣跑，事緣盛品儒駕駛技術麻麻，加上是盛家獨子，故蔡一鳳一早接了奶奶下的「禁車令」。
蔡一鳳（Michelle）是珠寶鐘錶設計師，亦是社交名人，外表細細粒，但性格嗜好均非常男仔頭，尤其喜歡揸跑車，有十年駕駛經驗的她，曾先後擁有三部跑車，繼mini cooper跑車和瑪莎拉蒂後，新寵是市值逾200萬元Aston Martin V8 Vantage N400，此車全球限量240部，她的座駕編號為8，香港亦只有兩部。原本橙色的車身，她特別請人為她貼上綠色，綠色是她最愛的顏色，豪花4萬買貼紙的原因，她說：「一來第日換車方便還原顏色，二來又可以隨時再換色，下次想轉磨沙紫色，女性化啲。」她說兩年前初搬入赤柱，為了出入方便而想買車，愛車是朋友轉讓得來，她說朋友收藏此車甚久，但絕少使用。
「閨蜜」歡迎外借
此車不知是多少男人夢寐以求的dream car，占士邦系列電影中亦不時出現Aston Martin不同車款的飛車場面，動力設計強勁，但在Michelle手中，則保持時速70公里的安全車速。她表示因車太耐冇開動，剛巧另一朋友向她借車，她二話不說便借：「部車好耐冇人揸過，軚盤好硬，有次借咗畀另一個朋友揸咗一個月，佢成日高速，軚盤即刻靈活晒。男人當車係『老婆』，我當係『閨蜜』，鍾意帶『閨蜜』出街一齊玩，同埋可以任借。」
揸得慢畀人呠
由於Michelle經常揸辣跑慢駛，她笑說已習慣被人眼望望：「啲人覺得呢部係男人車，見到女仔揸會好奇望多兩眼，我揸車又唔快，時速70公里，好穩陣，係奉公守法嘅司機，但就成日畀人呠，哈哈！（老公有冇揸？）佢有牌，但好少揸，試過有次佢揸golf car差啲碌落山，奶奶唔畀佢揸，得一粒仔，都係由我揸。」
文：名人組