蔡穎恩空虛病 Cheronna抑鬱喊 戲難下

Enjoy過程 學到嘢！

染了一頭紅髮的Cheronna與Evelyn首次一同分享做舞台劇的得着，縱然苦練三個多月，但她們坦言值得，當中上了寶貴一課，學懂眼神交流、說話聲線及肢體表演，兩人表示綵排過程相當享受，更以學習之心克服不安情緒。由於她們演舞台劇經驗不多，Cheronna更是處女下海，面對同劇的專業演員，她們直認當中存有恐懼，擔心自己會拖累整個劇團，故綵排期間曾試過情緒低落衝入廁所大喊發洩。

E：蔡穎恩、C：Cheronna@Super Girls

E：可以一班人做一件事好開心，過程係學習，喺導演、演員身上學到好多舞台上運用嘅技巧，教咗我好多，發音、呼吸同埋肢體語言。

C：愛上呢樣嘢（指舞台劇）同成班人，因為好難得有大班人上下咁齊心完全冇是非，成件事好熱血、好有火，每場好吃力同用好多精神，大家都好攰同帶傷上陣，當表演時就會忘我咁去做，過程係好難得，好開心認識到呢班朋友教識我跳舞、演戲，綵排過程真係學到嘢嘅，同大家建立到好好感情。

Evelyn覺得花時間綵排十分值得，獲益良多。	在壓力下完成「處女作」，Cheronna順利過關！	坐埋一齊大談「舞台劇經」，Evelyn（左）與Cheronna都會心微笑，回味無窮。

E：好多人會覺得用三個月綵排好長，我唔會用嘥時間形容，過程好享受，時間同過程係好開心，唔係冇得着嘅過程。

C：講真一定有壓力，喺Super Girls跳舞我係最快上手，嚟到呢度係最慢，因為好多演員都係專業跳舞老師，一學即識，有啲動作連細節未捉得到，佢已經知點郁，學舞過程，每次都想喊，好似喺度拖累緊人，我係入Super Girls先學跳舞，但嚟到先知咩叫真係跳舞，要開口問人，不斷對鏡做，好痛苦，加上成日跟唔到係咁甩，冇乜自信，個心理關口用咗好長時間先過到，要多謝身邊人鼓勵同支持，試過綵排緊衝去廁所喊，覺得做唔到，自己差太遠，覺得自己好廢，好多謝呢班朋友不斷鼓勵同畀自信我，真係喺呢十場裏面一場比一場進步，一場比一場更有自信發揮自己。

E：我都試過排到喊，唔想影響其他演員，嗰刻自己行開衝去廁所。

親熱戲 嗌尷尬！

兩人的角色分別是一動一靜，相同之處則是演情侶，可惜兩人的心態卻有不同，Cheronna直言感尷尬，為求逼真，出場前在後台與「男朋友」拖手熱身，而Evelyn因與男主角合作多次，有不少默契，加上只是錫面，故很易投入角色，由於Evelyn已有拍拖多年的圈外男友，雖然已向對方備案，但踢爆男友有酸溜溜感覺。

E：Cheronna個角色比較好動，我嗰套就較靜，故事起伏唔大，所以點樣令觀眾一邊欣賞一邊唔覺悶同投入，好取決於我哋演員點樣將感情帶出嚟，對於我嚟講舞台劇係一氣呵成，拍嘢就乜都可以停，因為我哋慣咗呢個模式，去到舞台上就好吃力，點樣可以喺場與場之間感情可以唔甩。

C：之前同林德信拍戲係好表面，今次真係做一對情侶，都好驚同尷尬，好少將自己嬌嗲同女人一面畀人睇，曾經有唔開心。

E：本身係想嘴對嘴，由於我自己同Jason（男主角陳柏宇）各自有另一半，大家覺得唔需要去到咁，劇中最親密係Jason錫我塊面一啖，嗰吓都錫得幾大聲，最尷尬係其中一場佢女朋友喺台下睇，我望到佢好驚，今晚攬唔攬好、錫唔錫好，不過我同Jason合作得多，有默契，所以大家演時都好放冇就住，只係蜻蜓點水，唔係好激烈。

C：我覺得好吃力，我好少表露自己拍拖個樣，淨係想畀對方（真正男友）睇，今次要做畀觀眾睇係尷尬，真係好唔舒服！不停周圍問人點演好，劇中仲有對演情侶，佢哋本身好熟，比起我哋演得好自然，我同對手有個位好近，喺排舞室我尷尬到係人都知，為投入角色，臨出場前拖定手醞釀吓先，講嘢慢慢變到好熟落，感覺就冇咁尷尬，不過一表演就冇理。

E：當然之前有同男朋友講會有錫面戲，佢冇呷醋，佢就OK明白我工作，唔係夾硬出現嘅劇情，佢冇投訴好大方，不過有少少酸溜溜。

騷後感 High變Down！

好多演員因太投入角色難抽離而令情緒有變，抵死的Cheronna笑言騷後長期處於「失戀」，每晚發夢都是舞台劇的情景及人物；騷後病足成個星期的Evelyn直認長期處於空虛感。

C：我仲處於失戀狀態，因為情緒太高漲、太High，記得第一場完咗真係瞓唔到覺！每晚發夢好似跳咗場舞咁，完全冇離開過呢個狀態，去到第十場完咗，自己會喺個群組度提大家出場熱身、帶咪、依家第幾場喇！仲好掛住大家同舞台，我哋喺群組不停講嘢，好似Family咁！呢個失戀期好長，個人其實好攰又有傷，但好攰都唔及空虛咁大，空虛到唔知自己做緊乜，有種想死感覺，會不斷喺電話度剪片，之後就係咁喊。

E：我就病咗成個禮拜，綵排時成隊人個個病，我同Jason反而冇嘢，直到尾二場就開始喉嚨唔舒服，當完騷慶功宴就開始咳，足足病成個禮拜，都Down，起身好空虛，過去三個月起身就趕住出門口綵排。

文：火品文

攝：嚴偉國

蔡穎恩服裝：earth music & ecology by i.t

化妝：Melody Chiu

髮型：Zap Tang@Queen's Private i