林煒珊卸任享天倫下一步造人

林煒珊前晚以去屆主席身份出席仁濟第49屆董事局就職聯歡晚宴，談到卸任心情，她坦言沒有捨不得，反而非常開心：「終於可以放下包袱，之前要打三份工，包括做媽咪、打理自己公司同仁濟，真係好辛苦，我已經盡力做，過咗好豐盛嘅一頁，好滿足。（覺得做足100分？）唔係我自己講，有好多project未見到結果，要遲啲先知。」

計劃外遊休息

她又指除了自己外，全家上下也很開心，她笑言：「囡囡最開心，我可以多啲陪佢，老公都好開心，唔使由朝到晚，連星期日都冇family day。總之全家都好開心，可以去長旅行，預計去西班牙，同有啲朋友喺外地結婚，上年為咗仁濟，連朋友喺外地嘅婚禮都去唔到。」

至於會否實行造人大計？她坦言要先休息，養好身體：「睇吓生唔生到，順其自然。」另外，提到亞視熄機，身為亞視前老闆林百欣孫女的她表示熄機當日不在港，並感嘆：「最慘係員工，喺公司咁多年，又冇糧出，又要告上法庭。依家有個ViuTV，我都有睇，睇咗最hit嗰套《太陽的後裔》。」

仁濟慈善大使馬德鐘與太太張筱蘭結伴亮相，他透露將到內地拍劇演反派。

陳自瑤悉心打扮，為晚宴擔任司儀。

拍劇再演反派

同場還有不少藝人參與，陳自瑤與鄭啟泰擔任司儀，許廷鏗負責於席間獻唱，而身為仁濟慈善大使的馬德鐘與太太張筱蘭及麥長青也有到場。馬德鐘透露將到內地兩個多月拍劇，在劇中飾演大反派，他興奮地說：「已經好耐冇做反派。（有冇難度？）好多年前都係做反派，今次好開心，因為已經有十年八年冇做反派。（係咪搵人仔好啲？）唔可以咁講，香港有好角色都想接，可以有多啲時間喺香港，香港觀眾見到我o既演出。」

文：名人組