林二汶墮台爆眉心縫7針破相
歌手林二汶前晚與哥哥林一峰等歌手在旺角麥花臣場館舉行音樂會，請來RubberBand與艾粒擔任嘉賓。二汶全晚表現Hyper，但當尾聲眾人獻唱《仙樂飄飄處處聞》時，懷疑台上太黑，她疑似被電線絆到，一不小心差錯腳墮台，頭部更撼落咪箱，其左邊眉心瞬間爆缸，地上亦有明顯血漬！哥哥一峰見狀立即上前扶起二汶，當時二汶依然清醒兼面露笑容，似乎未知血流披面。隨後，她由一峰扶落台及送往醫院。
受傷時冇感覺
被送往醫院的二汶憶述事件，指受傷時沒有太大感覺，故當時不知「咁大鑊」，直至哥哥帶落台才意識到傷勢嚴重。處理傷口後，她亦有拍片向粉絲報平安，指傷口共縫了七針：「約一星期就可以拆線，依家冇事喇！最想快啲可以洗頭。」在旁的一峰笑妹妹「鴻運當頭」。其後，二汶再在網上報平安，指已無大礙兼自嘲「刀疤汶」。
對於妹妹墮台受傷，一峰解釋事發經過：「台上有個窿，佢唔小心差錯腳搞到跌落台撞到眉頭，差少少撞到眼，未見過阿妹流咁多血！依家佢冇事當係小劫。」他指妹妹一向很小心，笑言今次是鬼揞眼：「佢仲想繼續唱，但啲血已經滴晒落件衫，梗係唔畀佢繼續唱！（擔心二汶破相？）佢好靚、好大命，佢靠把聲搵食！下次再開騷一定帶佢行一次。」雖然他多次表示妹妹冇事，但聲線明顯抖震。
見暈嚇親一峰
另外，一峰昨日出席慈善演唱會記者會，講到二汶情況，他笑說：「我個妹去急症室之後，其實我驚o架，因為佢話暈，原來係肚餓！」他又指二汶因休養而缺席今次記者會，但二汶助手則解釋她原定不需要出席，可能是溝通上出現問題。據知，二汶依然大聲講大聲笑兼已洗頭，未來一星期亦沒有公開活動。文：音樂組