陳凱琳唔肯咀第2個 嘉穎宣布「分開」

鄭嘉穎、陳凱琳、謝安琪及陳山聰等昨晚在尖沙咀出席新劇《殭》「黑夜之約 驚世現身」暨「myTV SUPER全城體驗」活動，藝人威利與陸永玩射箭遊戲時勝出，分別獲陳凱琳及謝安琪送香吻，謝安琪「送禮」錫陸永一啖，陳凱琳則未知是否男友鄭嘉穎在場，只錫自己手掌再將手放在威利面上取巧過骨。

拍劇變拍拖當Bonus

鄭嘉穎與陳凱琳拍住拖「打孖」受訪，問會否緊張收視？鄭嘉穎說：「平常心，最好嘅宣傳唔係今日，係拍劇時候做，觀眾眼睛係雪亮，識揀戲睇。」陳凱琳即「夫唱婦隨」和應。至於會否覺得拍拖就是最好的宣傳？鄭嘉穎說：「拍劇嘅時候冇諗過係咁（同陳凱琳拍拖），呢樣係Bonus，我同Grace都冇諗過用戀情嚟宣傳，希望套劇完咗，我同Grace有自己空間，公同私分開啲，我哋下一套都會分開拍。」至於是否為免尷尬而以後不再一齊拍劇？陳凱琳笑說：「睇公司安排，不過就算分開拍，都會畀劇本嘉穎睇，幫我分析同畀意見。」

陳凱琳望住鄭嘉穎玩遊戲時，雙眼發光，個樣冧到呢！	謝安琪（左二）堅咀陸永，而陳凱琳（右一）只肯以手代口「錫」威利。	鄭嘉穎與陳凱琳掛住咬耳仔，冷落身旁的陳山聰。

謝安琪囝囝幫口谷劇

另外，謝安琪被問到兒子會否捧場？她說：「佢冇咁夜瞓！（佢有冇話想睇？）囝囝知嘅，佢同學問佢我係咪真係殭屍，囝囝答：『你哋睇咪知。』」提到與鄭嘉穎有親熱戲，兒子能否接受？她說：「囝囝好專業知係工作，如果接受唔到，佢爸爸（張繼聰）同咁多女仔有親熱戲，屋企早就破碎咗！」而陳山聰被問到女友Apple打麻雀牌品被指「唔好」，他說：「我唔係當事人，唔方便講。（咁寫你女友喎？）每個人都有過去。」

文：影視組