陳奕迅硬晒軚學瑜伽
剛完成台灣巡唱返港的歌手Eason（陳奕迅），昨日孖實老婆徐濠縈（阿徐）、蔡一智與太太周雪芳、名模周汶錡和伍詠薇等，齊齊跟導師黃佩霞做瑜伽。周汶錡將合照放上社交網，見Eason一招金雞獨立，一臉肉緊狀甚搞笑。
昨日記者致電黃佩霞，她大讚只上了數堂的Eason：「最近阿徐帶佢嚟，做完佢自己都覺得好鍾意。（跟得辛苦？）佢做得幾好，做演藝界嘅朋友學嘢係快啲，有啲天分，好快上手。佢做到啲初中級嘅甫士，唔錯。（教一字馬？）冇，主要做平衡動作同練肌肉力，一般初學者身體未必咁快協調到，佢已經好過好多初學者，但身體柔軟度未夠，特別關節位、腰要加以改善。」問到是否因愛跑步令其身體太硬淨？她說：「都係，阿徐都知有呢個問題，所以佢都做瑜伽，平衡番，唔可以太硬梆梆。」她讚兩人有共同嗜好，好難得，只要Eason在港，便會隨阿徐拍拖上堂，非常恩愛。周汶錡則表示上堂遇到Eason，覺得愈多人做愈好，大家一齊追求健康。
