王宗堯撩莊思敏旅行擦出火

王宗堯昨日到柴灣宣傳ViuTV節目《體育係…》，與體操運動員黃曉盈、前學界田徑運動員梁穎瑜示範拉筋等熱身動作，Greg更依照黃曉盈示範，嘗試做出一個雙腿張開、只以雙臂撐起全身令臀部離地的動作，不過顯得非常吃力。

盼行業蓬勃

自認是英超球隊利物浦忠實球迷的王宗堯笑言，終於可一嘗當體育主持滋味：「以前喺英國讀書，見當地足球節目請球迷講波，啲球迷會爆粗，好得意，我都想試，不過呢個節目喺黃金時段播就唔方便講喇。（酬勞可觀？）唔知呢，交畀公司處理，我更重視嘅係新意同衝擊。（如果搵你同傳不和嘅莊思敏拍《跟住矛盾去旅行》制唔制？）好開心喎，去呀！應該幾好笑、幾好玩，我尋晚（前晚）都有睇第一集。我公司有好多多棲藝人，莊思敏、周柏豪咁，應該可以撞出火花。」

莊思敏經常與王宗堯隔空互寸，若真的合作節目，必定更有「火」。	黎紀君踢爆男友王宗堯鍾意唱騎呢歌。	王宗堯腿張開玩拉筋，但動作生硬。

王宗堯期望ViuTV盡快開拍自家劇集：「我都知ViuTV買好多外購劇，但我最希望遲啲呢個台都可以開拍自己嘅劇，因為我有好多以前都係做呢行嘅朋友，佢哋入唔到電影圈，又返唔到電視台，冇工作，好沮喪，所以好希望呢行可以多啲工作機會。」

愛唱騎呢歌

此外，王宗堯女友黎紀君（Christy）前晚到圓方出席活動，她透露下月將全身投入娛樂圈發展，近日正學習打鼓。她說：「公司想我向樂壇發展，自己鋼琴八級，依家搵緊老師學唱歌。（同男友一齊唱歌？）我鍾意唱K，佢好少唱，佢鍾意唱騎呢歌。（傳王宗堯同周柏豪爭做一哥不和？）佢睇到報道都唔係咁開心，佢冇咁嘅諗法。佢哋唔熟，只係做嘢見過，冇不和。」

文：影視組