湯唯唔識韓語BB國產
演員湯唯自懷孕後昨日首次在港出席公開活動，現身尖沙咀為珍珠首飾品牌剪綵，預產期在8月的她決定在內地生，還自爆生仔其實是為了放假，雖然醫生已照出BB性別，但她未想知道，至於老公金泰勇會否陪入產房，她說：「佢鍾意啦，唔知佢！」
湯唯昨日出席珍珠首飾品牌MIKIMOTO的新店剪綵活動，佩戴價值450萬的珍珠鑽飾出場，她更獲大會贈送價值逾41萬的珍珠頸鏈，已肚凸凸的她仍貪靚穿上高踭鞋，不過手腳纖幼未見水腫。
肚皮大肥十幾磅
已懷孕四個月的她以「好大」來形容自己的肚皮，她不想知道BB性別，囑咐醫生不要透露，她並談及懷孕以來全無不適：「人哋話係福氣，肥咗好多、好快，但手腳同面就冇肥！（過十磅？）唔止十幾磅啦！」預產期於8月，湯唯決定在內地生，其夫金泰勇是韓國人，為何不選擇在韓國生BB？她笑謂：「我聽唔明韓國話喎。（唔喺香港生？）到時先算啦。（Book好晒？）我唔理啦，我都唔係好明呢啲嘢。（生幾多個？）生咗呢個先啦。（老公陪入產房？）佢鍾意啦，唔知佢！」
為咗放假先生仔
湯唯又說：「我因為想放假先生仔，懷孕可以唔接工作，希望趁呢段時間休息養精蓄銳。」曾被老公笑指是男人的她，笑言佗B後變得貪靚，愛上穿裙。問她變得貪靚是否因為佗女？湯唯說：「因為依家似放假，但完全唔工作我頂唔順，出吓活動咁幾好。」將來BB會在哪個國家長大？她說：「未知，總之父母生在不同國家係麻煩啲。」
有份角逐香港電影金像獎最佳女主角的她，因懷孕未有出席頒獎禮，甚至沒有睇直播，失落影后亦不介意：「好開心可以同劉青雲合作，留咗個美好回憶畀我。」談到奪最佳電影的《十年》鬧出不少風波，因她沒有睇直播又不曾看過該片，並不知此事。她同時否認早前在跑馬地睇樓，準備在港置業及在港生BB的傳聞。
文：影視組