區瑞強率大樂隊Sing戰無綫小生
區瑞強將於5月底在灣仔伊館開騷，雖然三年前曾邀兩位囝囝上台做嘉賓，但他為免冇驚喜，反而請來無綫新進小生陳展鵬和袁偉豪前來大騷唱功。民歌形象深入民心的他常被誤會「一支結他走天涯」，他坦言每次個唱均有超過十人的大樂隊助陣，絕對不惜工本！
「民謠宗師」區瑞強（Albert）將於5月26日至28日在伊利沙伯體育館舉行「區瑞強我們一起唱大演唱會2016」，連續五年開個人騷的他笑言已變成與歌迷之間一年一度的聚會，今年與以往一樣，會有多個慈善機構受惠，包括音樂農莊基金、甘肅愛心飲用水源、靈實恩光成長中心等。
翻唱保育靚歌
這次個唱Albert將大唱50年來最好聽的歌曲，保證起碼唱50首以上兼首首耳熟能詳，他也在網上收集意見，讓歌迷從150首歌曲中挑選最想聽的歌曲。在樂壇及DJ界縱橫多年的Albert，認為七、八十年代的樂壇是最百花齊放，不少經典歌及超級巨星亦在當時誕生，他一直推動「靚歌保育」，就是希望將這些珍貴足迹流傳下去：「如果你唔播，唔重新演繹啲歌，係會冇咗，因為依家後生嗰代已經唔識，但我覺得好可惜，呢啲歌係我哋嘅根嚟。」
嘉賓方面，除了有「鐵膽」曾志偉、黎瑞恩外，他透露已邀請無綫藝員陳展鵬、袁偉豪參與演出：「大家會有驚喜，估唔到佢哋唱歌咁好！」提到他在2013年的個唱上曾邀兩子合唱，他卻表示今次不會再父子合唱：「年年一樣就唔好睇，可能下年先啦，佢哋要準備。」
製作不惜工本
不少從未欣賞過Albert演唱會的人，會以為他只會拿結他唱足整場騷，對此他說：「好多人以為我一個結他就可以唱一個演唱會，係得嘅，但我其實做咗廿年演唱會，每次都有超過十個人嘅樂隊。」又指每次音樂製作都不惜工本。
文：音樂組
攝：樊愛慈