陳凱琳黑絲蝙蝠撼晒腿雙嬌

陳凱琳強調自己工作時絕不遲到，故對傳言感到委屈。

無綫劇集《殭》演員陳凱琳、劉佩玥、陳嘉寶、陳山聰、陸永等昨日在銅鑼灣街頭為劇集宣傳，吸引大批市民圍觀。陳凱琳以蝙蝠造型示人，被大晒美腿的劉佩玥與陳嘉寶夾擊。陳凱琳被問到其男友鄭嘉穎為甚麼沒來宣傳？她說：「公司安排，佢遲啲會同謝安琪一齊宣傳。（今日打扮咁密實？）件衫公司安排，自己覺得造型好似小蝙蝠咁，大家都唔敢行近，驚畀我對翼拮親。」

澄清絕對冇遲到

有指陳凱琳與鄭嘉穎拍拖後工作態度差，陳凱琳坦言感到不開心，幸有男友安慰，她說：「有啲唔開心，但最緊要朋友知道我嘅為人，希望大家睇完得啖笑，唔知道點解會有咁嘅新聞，父母都有安慰我。（男友有冇安慰你？）有，佢話大家都知你唔係咁嘅人，唔使介意人哋嘅睇法。（拍拖後工作態度有冇改變？）我好重視時間觀念，幾乎唔會遲到，所以報道話我遲到，唔真實。（做鄭嘉穎女友壓力大？）唔係壓力，唔想因為我哋嘅關係畀人攻擊，我哋都係正常人拍拖，希望唔好講到好似針對我哋嘅關係咁。」

陳凱琳以蝙蝠女造型示人。	陳山聰、陳凱琳和陸永等現身銅鑼灣，引市民圍觀。	劉佩玥（右）和陳嘉寶的長腿夠煞食。

茶水阿姐讚有禮

劉佩玥與陳嘉寶皆力撐陳凱琳，劉佩玥說：「同佢好好朋友，唔覺得佢態度有轉變，希望佢唔好受到影響。」陳嘉寶則說：「Grace（陳凱琳）份人好nice，有時都聽到化妝間、茶水姐姐讚佢好有禮貌，我就唔相信，可能係誤會。」劉佩玥與陳嘉寶齊齊騷美腿夾擊陳凱琳，陳嘉寶笑說：「最初以為大家都係着到咁上下，嚟到先發現自己着得咁清涼，戲裏面我好打得好男仔頭，宣傳要着靚啲，話畀大家知我係個女仔，都睇得吓o架。」

文：影視組