黎耀祥撩上床毛舜筠：肉酸！

昨日藝人黎耀祥、毛舜筠、湯盈盈、郭少芸、陳國邦及邵珮詩等宣傳TVB新處境劇《愛．回家之八時入席》，與市民玩遊戲，現場有大批內地fans專程來港撐場，當毛毛及祥仔受訪期間，多位fans湧前索合照，毛毛亦一一答允，祥仔笑言活動猶如變成毛毛fans聚會。

「有冇打茄輪」

今次是祥仔及毛毛繼《畢打自己人》及《天天天晴》後相隔多年再合作，會有感情線，至於有否親熱戲？毛毛即踢爆祥仔曾問此問題：「呢個人肉酸喇！問我哋有冇打茄輪呀！」祥仔指兩人於《畢》劇最後有蜻蜓點水一吻，今次應更進一步滿足觀眾，嚇得毛毛說：「我驚觀眾嘔呀！」祥仔即讚毛毛秀色可餐，毛毛反指他是「獸色」，場面搞笑！

之後祥仔說：「我哋呢個年紀，咀就唔好搞喇，希望條感情線溫馨浪漫，有床上戲都唔拘。」毛毛再爆料指祥仔問她有否跟男主角咀嘴，當他知道有之後勁大反應，毛毛即反問祥仔有否拍咀戲？祥仔說：「我比較少，可能樣衰……你當係益吓我啦！」

祥仔與fans自拍。	黎耀祥（右起）、毛舜筠、陳國邦、湯盈盈齊谷新劇。	郭少芸扮高層？在無綫就地取材啦。

郭少芸笑到攰

《愛．回家》共拍了995集，兩人表示新劇冇可能有此集數，望適可而止，祥仔更暗示這次可能是毛毛最後一次拍電視劇，毛毛說：「呢啲唔好講，總之大家珍惜我哋呢對組合。」講到亞視前晚熄機，兩人均沒有直擊冇畫面一刻，反而勉勵亞視員工不要太傷感。

郭少芸在新劇中飾演電視台高層，說到會參考誰？她笑說：「有幾多個吖，總之成日笑，數字人生呀！」謎底呼之欲出！而她更要為新角色練笑：「鬧人、窒人都要笑，好似新娘結婚咁笑足成日，好攰！」她寄望新角色予觀眾新鮮感，要為「孻姑」一角洗底。前晚她還約飯局睇《愛》劇結局，難免不捨：「今次係繼《真情》後第二次咁長劇，我嘅藝術生命中相信未必有第三次。」

文：影視組