徐榮腦戰馬強林漪娸靚湯呵番

處境劇《愛‧回家》播了三年，劇中每個角色都深入民心，其中徐榮演馬強，因角色太入屋，觀眾很容易把「徐榮」與「馬強」畫上等號，對此徐榮說：「我係徐榮呀……唔係馬強呀！」

然而，徐榮也承認，馬強難免有時會在徐榮體內「作怪」：「馬強呢個角色喺我體內住足三年，對我影響好大！好多時徐榮同馬強會喺我腦入面打交，因為兩個人性格好大分別。馬強比較優柔寡斷，我就急躁啲，我起碼會識鬧人。有時我都睇唔起馬強，成日會覺得佢咁做生意唔掂！」

至於徐榮與林漪娸演了三年夫婦，有否「戲假情真」？徐榮直言：「梗有！當正佢係我老婆！佢周時會帶湯水畀我哋，當我哋一家人。初初同佢未係好熟，我哋喺戲中比較以禮相待，後來同佢慢慢有默契，就發展出另一種演法，會互相寸吓，對白係一樣，但語氣可能粗聲粗氣啲，咁先貼近現實。」

徐榮覺得自己與馬強的性格很不同。	林漪娸與徐榮已建立了默契。（資料圖片）	早前徐榮將初生女兒帶入劇組，令拍攝氣氛變得更輕鬆。

BB演出獲厚待

另外，徐榮早前為劇組帶來一位「小天使」，就是其初生女兒徐心怡（乳名包包），她演馬子仁女兒馬家好。馬家好雖是BB，但已有巨星般的待遇，每次開戲不多於三小時，每星期不拍多過一次劇，甚至同劇演員要先消毒雙手才可與她有對手戲。「包巨星」降臨劇組後，兩父女人氣急升，頻接受媒體訪問，問徐榮會否覺得女兒名氣太大而呷醋？他得戚說：「唔會，佢都息影啦！」

文：張敏妍

攝：吳文聰

場地：Casa Bakery