林嘉欣平常心爭金像大滿貫
早前成為金馬獎史上首位「大滿貫」演員的林嘉欣，於今屆金像獎面對三大影后張艾嘉、湯唯及楊千嬅的挑戰，加上後起之秀春夏來勢洶洶，真的未到最後一秒也未知結果，但可以肯定的是，若今次嘉欣順利封后，將會繼金馬後又創下金像獎「大滿貫」紀錄。賽前的嘉欣卻看得平淡，認為一切要靠運氣，更坦言現時有女兒及丈夫，對獎項已沒從前般野心勃勃！
今屆金像獎入圍「最佳女主角」的林嘉欣、張艾嘉、楊千嬅、湯唯及春夏均是實力派演員，前四位同是影后級，實力毋庸置疑，內地女星春夏這位生力軍也不容忽視，已先後憑《踏血尋梅》奪過不同電影節的「最佳女演員」獎，如今還一箭雙鵰角逐「最佳新演員」及「最佳女主角」，與幾位前輩也並非冇得鬥。
讚新人演出有驚喜
嘉欣今次憑老公袁劍偉執導的作品《暗色天堂》問鼎影后，透露已看了大部分對手的入圍作品，認為張艾嘉、千嬅及湯唯同樣是出色演員，但對新丁春夏演出有驚喜，她謂：「全裸係其次，佢演到好自然。（有信心？）同信心冇咩關係，對頒獎禮態度順其自然，因為好睇評審口味，呢啲都係睇運氣。（視佢為勁敵？）又冇覺得，實有人拎獎，係互相欣賞，佢哋有嘅嘢我冇，唔好用比較心態，我只睇到人好嘅一面。」
提到已成為金馬首位「大滿貫」演員（集齊「最佳女主角」、「最佳新演員」和「最佳女配角」），若然於金像獎摘下影后，將再次「大滿貫」，嘉欣指去年於金馬獎未有抱獲獎心態，皆因獎項得失決定權不在她：「今次睇得好淡，希望唔好着得太差畀人講，我純粹支持電影盛事心態，拎唔拎唔抱大期望。（外間咁講令你有壓力？）完全睇得好輕，套戲拍完到依家大半年，個角色已經離我好遠。（諗定致詞？）冇，以前會有得失心，做咗媽咪後就冇，影壇缺乏新一輩，所以會用giving心態，希望有更多電影演員出嚟。」
老公(目及)實唔畀性感
對於在金馬封后時打扮性感，嘉欣不諱言可一不可再，加上今次與導演兼老公踏紅地氈，故預告屆時定必密實兼低調，她謂：「我先生未必畀我咁着（性感），又唔係Model，毋須為露而露，最緊要舒服。（以前畀人批評過有壓力？）我都想尊重場合，想畀人讚，嗰時狀態唔好，由面到腳趾尾都圓，過咗30歲Baby Fat冇咗，湊兩個小朋友要好多體力，咁Firm番啲，起碼Carry到人哋件衫。」
最佳女主角提名名單
春夏《踏血尋梅》
林嘉欣《暗色天堂》
張艾嘉《華麗上班族》
楊千嬅《五個小孩的校長》
湯唯《三城記》
文：影視組
攝影：吳文聰
場地：銅鑼灣柏寧酒店
化妝：Will Wong
髮型：Hin Wan
服裝：I.T.