甄子丹最後一夜情繫亞視黎燕珊：永遠喺香港人心中
陪伴港人成長的亞洲電視，開台59年終於都畫上句號，今晚踏入零時，亞視就要真正停機，成為香港電視史上的一頁！雖然今次告別帶着遺憾、唏噓與無奈，惟時辰到，再無人可以留得住……亞視永別了，讓我們緬懷亞視最風光的成就——孕育出「宇宙最強」甄子丹、一片奪七大影帝名銜的張家輝、首屆亞姐冠軍黎燕珊及1991年亞姐冠軍又獲封「美魔女」的羅霖等等，大家對亞視都抱有深厚感情，告別在即別有一番滋味在心頭。
曾於1995年效力亞視的甄子丹，如今雖貴為「宇宙最強」，念舊的他對亞視今晚「熄機」大表關注。目前正身在外地拍攝電影《3X反恐暴族3》的子丹，面對亞視最後一夜，不禁緬懷他對亞視的一份感情，並為昔日的手足打氣。
好有人情味
子丹說：「喺1995同1996年我喺亞視拍咗《洪熙官》同《精武門》兩部劇，印象中亞視係一間非常有人情味嘅公司。當時拍呢兩部劇集，亦畀咗好大同好好嘅回憶畀我。我想講亞視其實有好多幕前幕後精英，如果搵到新公司嘅，要繼續努力，未搵到嘅，希望早日搵到新嘅平台，繼續工作落去。梳頭、化妝、服裝嘅工作人員同埋打燈等等，都係好好嘅電視人才。我想喺度講一聲：『加油！』」
踏從影之路
生於武術世家的子丹，11歲移居美國波士頓，繼而到北京市什剎海體育運動學校武術隊接受兩年訓練，完成訓練返美國途經香港，獲介紹與導演袁和平認識，其身手備受賞識獲邀擔演電影《笑太極》，更在《奇門遁甲2》與袁和平合演兄弟及擔任替身，確定從影之路。惟九十年代傳統功夫電影沒落，他轉往電視圈發展，1995年演出亞視劇集《洪熙官》及《精武門》而備受關注，回歸影圈的子丹輾轉拍了《殺破狼》、《導火線》等影片，事業再見曙光，直至2008年拍《葉問》聲名大噪，成為「宇宙最強」蜚聲國際。
甄子丹
1995年效力亞視
亞視作品：《洪熙官》、《精武門》
電影代表作：《殺破狼》、《導火線》、《葉問》
黎燕珊：永遠喺香港人心中
於1985年參加亞視首屆亞洲小姐選舉而贏得冠軍的黎燕珊，對亞視有一份特別的情懷，當選亞姐冠軍的她即獲力捧，曾演出《西施》和與前夫劉永合演的《成吉思汗》。黎燕珊說：「成為亞姐豐富咗我嘅演藝事業，公司畀咗好多第一次我！」
要能屈能伸
對亞視的難忘經歷，阿珊懷念埋首拍攝的一段日子：「令我最難忘嘅係每日都好忙，冇時間返屋企，要帶埋牙刷返工，於是乎自己諗，不如揸車嘅時間都慳番，喺架車度瞓覺，或者喺廠瞓覺，瞓一兩個鐘就繼續開工。」一頓她又說：「除咗演戲，亦有機會做主持，當時老闆邱生（邱德根）好愛錫我，好多時都勉勵我，要能屈能伸，要向好方面睇，當我係女咁。」
對於亞視停播在即，阿珊感慨地說：「無論我嘅演藝事業同人生歷程，我都好感激、感恩亞洲電視畀我嘅機會，先會有今日嘅我！今日到咗亞視停播嘅一日，對我嚟講係一件非常痛心嘅事，但係，曾經令香港人有過輝煌歲月嘅歷史，亞視永遠都會喺香港人心中，我哋會永遠懷念你。」
黎燕珊
1985年首屆亞洲小姐冠軍
代表作：《西施》、《成吉思汗》
文：影視組