劉欣宜晒E Cup新郎口窒窒
現年27歲的「E Cup Baby」劉欣宜（Miyoko）昨日下嫁35歲的音樂人老公陳子敏（Roy），Miyoko在晚上的婚宴穿粉紅色低胸婚紗示人，大騷34E上圍，Roy受訪時說婚宴前的簽字儀式要講誓詞，他緊張到黐脷筋。婚宴的賓客之一張繼聰帶老婆謝安琪到賀，阿聰讚一對新人好登對，新郎甚有才華。
「E Cup Baby」劉欣宜昨日與拍拖五年的音樂人老公陳子敏結婚，早上Roy先率領一班兄弟接新娘，期間被姊妹團玩，Roy和兄弟要扮美少女戰士和笠絲襪，Roy更要用腳趾夾唇膏幫兄弟搽嘴，兄弟就錫到他滿面唇印。
媽咪講感受即喊
Roy最終過關接到新娘，並向老婆發表愛的宣言，承諾會好好照顧她。接新娘後，兩人在律師見證下宣讀誓詞、交換戒指及簽字結婚，期間Miyoko感動落淚。
一對新人晚上在九展筵開39席宴請親友，傍晚約六時兩人見傳媒，Miyoko以粉紅色低胸婚紗示人，大騷34E上圍，兩人應傳媒要求幾度咀嘴。受訪時Miyoko表示婚禮很感動，坦言喊得很厲害，又指父母都有感動落淚：「媽咪之前同我講唔使叫佢講嘢，因為佢驚一開口就喊，今朝着裙褂拍片叫佢講幾句，一開口佢就喊。」Roy謂行禮入場和講誓詞環節特別感動，更笑言緊張到黐脷筋。
改北海道度蜜月
Miyoko謂結婚戒指有半卡，問她將到哪裏度蜜月？她說原本想去歐洲，因老公想睇足球賽，但因歐洲出現恐襲，故改去北海道，問可會乘機造人？Miyoko想先過一至兩年二人世界之後才積極造人。
而到賀的圈中人包括張繼聰、謝安琪、周國賢及袁偉豪等，阿聰受訪時說跟新郎較熟：「同Roy識咗好耐，以前一齊做音樂，同一間公司一齊jam歌。（傳授相處心得畀佢哋？）Roy好溫柔，又靚仔又有才華，都同佢太太拍過嘢，佢哋好登對，祝佢地連生貴子。」
文：音樂組