陳瀅低調護愛苗 公開賀四太

女神陳瀅（Jeannie）、吳業坤及張秀文等，昨日出席服裝品牌活動。期間坤坤與張秀文合照時，任司儀的森美叫坤坤搭住女方膊頭，一臉尷尬的他只好握着拳頭輕掂對方，場面搞笑。Jeannie受訪時，提到前日是賭王四太梁安琪生日，正與四太兒子何猷亨拍拖的她表示有跟四太講生日快樂。

認成功入屋開Party

在再三追問下，Jeannie才承認有出席「未來奶奶」的生日會，期間更多度以「低調」為由護愛苗！問到可有送禮物？Jeannie謂：「我同對方家人都想低調啲。（陪男友一齊買禮物？）都話低調啲。（已融入何家？）呢啲係禮貌嚟。」問到男方親友可有催婚？她即忍不住掩嘴甜笑謂：「都話低調！」之後更即扯開話題。問到可會與男友穿情侶裝？她再次笑言：「要低調，其實我鍾意同朋友襯衫，但鍾意同女仔多啲，例如劉佩玥。（男友信你買衫眼光？）我成日會幫王敏奕買衫。（男友呢？）低調！」期間她更不忘賣口乖對鏡頭向四太送上祝福：「祝Auntie愈嚟愈靚，身邊健康！」而四房千金何超盈昨日亦有上載溫馨家人合照賀媽咪生日，並大讚四太是Best mama。

四房千金何超盈昨日上載家人合照賀媽咪生日。	坤坤與張秀文合照時，幾經催促才一臉尷尬輕掂女方膊頭。	吳業坤（左起）、張秀文、陳瀅及吳若希與現場卡通人物大合照。

坤坤成副身家氹女

此外，同場的坤坤則謂小學時曾買卡通人物文具送給心儀對象：「會買五蚊嘅文具畀人。（嗰時嘅成副身家？）係呀。（接受心儀對象係拜金女？）我鍾意簡單啲嘅女仔。」提到他在活動上自言大隻咗，直言不介意拍劇要騷肌：「會有個動力去做，但依家大家好似滿意我嘅身形，所以我好懶散。」

至於鄧麗欣與方力申分手後被指戀上台灣富貴同性密友，身為好友的森美則謂兩人不似拍拖：「有時影到一齊未必真係一齊。（覺得佢性取向轉變？）自己成長時都會質疑過，有啲朋友結咗婚先轉，唔出奇嘅。（網友想佢同小方復合？）我怕佢哋仲喊緊，有時登對唔一定要一齊。」

文：音樂組