學友爆大女未有男朋友
張學友、林嘉欣、張家輝及黃秋生等昨晚出席電影首映，講到湊女心得，嘉欣表示有上堂學與女兒溝通，並認為父母應尊重子女，學友即爆笑指其實是女兒不尊重他。
張學友、林嘉欣主演的英皇電影《暗色天堂》昨晚舉行首映禮，嘉欣與導演老公袁劍偉聯同張學友、黃秋生、張家輝、洪卓立、湯怡、衛詩雅、羅蘭及英皇老闆楊受成伉儷等人出席！陳奕迅低調入場未有拍照。
讀育兒課程有用
嘉欣孖住學友受訪，學友表示沒有帶太太羅美薇及兩位女兒撐場：「我做嘢，佢哋好少嚟，都唔會另外同佢哋睇，呢套戲爭議性大，費事解釋咁多。（怕個女問？）大女都大個，依家想佢問多啲都唔問啦！細女就仲會問啲無謂嘢。」學友指嘉欣湊女方法較嚴，嘉欣自爆前年報讀適用於二至十二歲的育兒課程：「有用呀！小朋友係個體，要令佢哋知道有責任，到大過十二歲就要尊重佢哋。」學友笑說：「我不嬲都尊重佢，係佢唔尊重我之嘛！」十五歲大女瑤華早前被拍到與一班同學外出，學友指是同學，女兒未有男友，是否驚？他說：「唔驚，邊度驚得嚟！」
預告片中嘉欣向學友兜臉潑紅酒，他踢爆嘉欣不懂潑酒，第一Take只潑到他膊頭，之後她搵副導演做靶練習，學友更扮副導演的無奈表情，非常搞笑！提到跟老公袁劍偉合作感受，學友先搶答：「正囉，開心！」嘉欣正色說：「其實佢好嚴謹。（有鬧你？）會討論，唔係鬧。」台上嘉欣讚學友的角色很適合他：「要有魅力但唔使太靚仔，否則會有好大包袱，咁佢冇問題啦。」學友即自言「包袱好重」。
家輝文藝加味精
學友「細佬」家輝認為香港應有更多類似《暗》的文藝片，他說：「拍呢類戲做演員係ＯＫ，但製作就會落多啲味精，始終自己咁多年嚟都重口味，要商業啲。（加鹹？）哈哈！一定啦！」講到嘉欣與導演老公合作，家輝直言若將來的製作有適合女角色，定會請太太關詠荷演出。
文：影視組