溫家偉事業有成先拍拖
「大隻仔」溫家偉（Alan）最近拍戲、拍劇之餘，亦忙於打理雪糕店，實行「三線」發展，笑言無暇經營愛情的他對女伴年齡不設上限：「性格夾就ok！」他亦大講自家雪糕店的發展大計，揚言要在首間舖頭開業的一年內，在香港區再開分店，並計劃衝出香港！
最近進軍影壇的「大隻仔」溫家偉（Alan），又拍劇、又拍戲、又要打理雪糕店，他受訪時都直認生活非常忙碌：「近排真係比較忙，雪糕店跟住拍戲啦，跟住又雪糕店啦又拍戲囉！準備會去泰國拍套笑片，我負責搞笑，開頭其實想拍多啲認真嘅戲，但係拍笑片拍得多都覺得好啱我，拍得好舒服好開心！」
雖然忙到爆，但雪糕店的大小事Alan都從不假手於人：「自己keep住成日落去，因為每個月轉新味道，都係由我同師傅去研究。啱啱都試咗啤酒味for蘭桂坊嘅嘉年華，亦有公司搵我哋合作。生意都進展得好好，暫時未回本但個方向好啱，想喺開業一年內開到第2間分店，如果開埋就唔會咁快賺得番，而且自己好鍾意試新嘢，成日買啲新機器都要用好多錢。」
目標開幾千間分店
諗頭多多的他，又笑言在港開幾千間分店，或會進軍海外：「喺香港嘅目標就開3、4千間啦！下一間想開喺香港區，因為原本雪糕三文治源自外國，嗰邊較多外國客，想畀到回憶佢哋。都想喺其他地方開，依家都有人聯繫緊我哋，好似馬來西亞、新加坡同澳洲，想quality control可以做得好，但係一旦唔係under我哋就會難搞啲，首選嘅地方都係亞洲，遠嘅話會比較難成日飛過去。」
談到感情事，Alan就坦言時候未到：「都係嗰句啦，要拍拖要做好自己啲嘢先，拍拖成世人都可以拍，但係拍戲做生意真係要嗰個moment就去做，唔可以等。錯失啱嘅對象都冇辦法，我想自己好stable先去發展感情，而對方年紀我就唔介意，傾得埋、性格夾就ok，幾多歲冇乜所謂！」
場地：Hearties Studio
服裝：Quiksilver
文：陳丹
攝：榮