蔡一鳳發功四撐老公 小三被飛怒爆大鑊

前亞視靚仔高層盛品儒前晚驚爆有小三，事源「小三」Tasha在討論區聲稱曾與盛品儒有關係，更聲稱曾懷有對方ＢＢ，事後盛品儒表示二人在婚前婚後有來往，更自嘲為求得到老婆蔡一鳳原諒，已跪了成晚玻璃，並雙膝已「受傷」！

無心情取消活動

原定昨晚盛品儒與太太出席「金花獎國際電影節2016」，昨午蔡一鳳亦以短訊回覆本報表示會與老公同行：「Tasha不斷用語音訊息send畀James（盛品儒），好似想搞大事，唔放過James。」惟直至晚上活動開始時，仍不見盛品儒蹤影，本報再度聯絡蔡一鳳，她則表示取消此行：「今晚我唔去，老公都會取消。（點解？）被搞到無晒心情。」

雖然老公鬧出小三風波，不過身為老婆的蔡一鳳，由昨早到晚在Facebook留言「四度」力撐老公，先是指在一年前已勸Tasha不要再作出騷擾，更揚言捍衞家庭是女性本能：「希望老公痛定思痛。因為我之前太忙了，這位小姐才有機會不停地撩我老公，希望她回頭是岸。事情是，這是以前小兩口的彆扭事，被有心人士利用了。一年前已經請呢位小姐唔好再不停發訊息打電話給我老公，捍衞家庭是女性本能。」

小三Tasha大爆與盛品儒在去年一、二月於Facebook認識。	Tasha公開兩人對話，更指自己早於六月有BB。	盛品儒封鎖與小三聯絡方法，令對方於討論區爆大鑊！

提告誹謗或通姦

直到晚上她則坦言已在去年4月警告過Tasha，更好言相勸對方不要一錯再錯！最後，蔡一鳳似乎對小三已忍無可忍，指Tasha在網上的控訴她已看到，更表示可能會提出法律訴訟：「妳的每一字每一句都直插我的心臟，血流不止。的確我和老公的關係也被嚴重破壞。不過妳可能不明白，這個世界除了自己還有家人……對不起，我很珍惜，比珍惜自己的生命還珍惜！……妳想我提起法律訴訟告你誹謗我老公還是和我老公通姦？妳的目的是什麼？」文：專案組

昨日Tasha接受本報電話訪問，指和盛品儒是在去年初透過Facebook認識，更出示多張和James的對話截圖，更有附上酒店地圖，她稱在討論區公開兩人關係純粹是宣洩。Tasha說：「我哋舊年一、二月喺Facebook認識，佢話自己冇老婆，之後約出嚟見面。有去大家屋企，亦都去過兩、三次酒店。（去酒店做乜，有冇發生性關係？）呢啲唔講啦！其實我之後都知佢係有老婆，我有提出過大家唔好見。」

Tasha指直到四月時，蔡一鳳曾致電給她：「當時佢打嚟鬧我，我有喊有講對唔住。但第二日朝早James就打畀我話：『BB你唔好嬲，我老婆噚晚好惡發好大脾氣！』跟住我哋又再保持見面。直到我七月生日，佢仲話一定要安排食飯慶祝。」

曾主動提分手

交往期間，Tasha指有主動提出分手，更編造和舊愛翻撻的理由：「當時James都話ok，但到九月時佢又主動搵番我，又成日話叫我等佢。」之後Tasha和盛品儒開始減少見面，緣於盛品儒常要到外地工作，Tasha說：「我哋最後一次見面係一月二號，（有冇進行親密性行為？）點會冇！大家識咗咁耐。」

Tasha聲稱本來於上星期二，約定本周三（3月16日）見面：「約咗之後佢開始話忙，發現佢電話whatsapp等block咗我。」她說有感對方未有正式交代，有苦無路訴，故在討論區訴苦，又聲稱「唔想對方難做」而隱瞞去年六月為對方墮胎：「我同James咁耐真係鍾意佢，點解玩消失？James上星期先知我六月有BB，當時佢話我一直冇提，以後都唔好提。早兩日蔡一鳳有打畀我，佢代佢老公講對唔住，我都有話想約出嚟傾清楚。我唔想要啲乜，一直以嚟我都冇攞過James任何嘢。」至於蔡一鳳在Facebook反問是否要告Tasha誹謗及通姦，Tasha說：「我有證有據，點告？告通姦豈不告埋佢老公？」