黎明正能量阻輕生勸學生瞓醒至算
黎明（Leon）由「黎天王」近年被封為「金句王」，今次《東網巨星》特別為他度身訂造專題節目《黎明話你知》，Leon用其「金句王」智慧解答市民的各種疑問，由私人到社會大事，包括再婚、投資心得，一一「話你知」。
有娘嘅時候「自己未必注意」
Q1：黎明哥哥，近排咁多學生自殺，有咩方法可以鼓勵佢哋？
黎明：覺得有乜嘢可以鼓勵佢哋？咁我諗唔會自殺嘅永遠點都唔會自殺o架啦！咁喺自殺之前嘅人係應該未有人鼓勵過佢哋，咁我覺得最緊要正面啲，畀自己盡量去諗多啲開心、諗開心嘅嘢，早睡早起，第日再睇吓需唔需要有呢個決定。其實每個人命數都有注定，咁當然係一件唔開心嘅事，但我相信若然正能量夠嘅同學知道自己目標係唔會做呢樣嘢，係目標比較含糊或者自己比較失落先有咁諗法，盡量開心啲，你開心完仲想諗自殺嘅，你先再考慮。
Q2：你覺得自己最娘同最Chok係咩時候呀？
黎明：我最娘最Chok？咁我梗有娘嘅時候，但自己娘嘅時候，自己未必注意啫！因為有啲娘唔係太娘嘛，娘梗有o架啦！咁咩時候……呢啲係喺自己唔知嘅情況下發生咗娘嘢，有時我懷疑可能啲人覺得我講金句都係娘o架，原因就係你哋用呢個字嚟笑人。
投資似感情「要斬就斬」
Q3：你好，黎明我想問聲你，人家都講你投資有方，想請教你怎樣投資會更好？
黎明：第一，有人話我投資有方，邊個話你知我投資有方先？又冇證冇據，冇o架，總之唔好大咬，唔好太貪心，做人就會開心！投資都係唔好太大咬，因為正常嚟講你追，愈追先會愈輸得愈甘，總之到咁上下就夠，長線投資就擺埋一邊唔好睇，短線就似感情要斬就斬。
妙計獻盛男「將金同情擺埋一齊」
Q4：黎生，我有嘢想問，我女友成日都日嘈夜嘈好鬼煩，有冇辦法可以令佢收聲？賜吓橋吖？
黎明：女友日嘈夜嘈，OK！冇乜辦法叫女友唔好嘈？咁又唔可以教壞人，通常有時啲小朋友，好細嗰時BB仔、BB女好嘈、好百厭時，就好離譜畀啲睡眠劑畀佢哋食，等佢哋唔好嘈，但女朋友嘅話，嘈嘅話，我諗你揀過個算喇！你揀過個後，到時又鍾意番嘈咪追番佢囉！來來回回係咁o架啦！冇辦法Stop佢（指女友）Stop唔到。
Q5：我有個Friend喺40歲未結婚，有冇辦法幫佢搵老婆呀？有啲咩明星介紹？
黎明：如果40歲都未結婚、仲未搵到老婆，唔緊要嘅，睇佢係咪一個事業型，有能力囉！我聽講我有個朋友嘅朋友嘅朋友，佢都好有錢，到四十幾歲都未結婚，識到個女友，咁個女友生日嘅時間就同佢阿媽一齊放咗個生日蛋糕喺中間，個生日蛋糕就放喺一間好靚屋喇，而佢嘅生日願望就係間屋！咁你撞到啱嘅，咁就唔講錢講心，撞唔到嘅佢就將金同情擺埋一齊，咁視乎你自己際遇，四十歲結唔到婚好正常啫！呢個世界上好多人都冇結婚啦！但係如果你有緣分搵到愛嘅，「冇得強求」四個字，睇運。
賺好多錢「娛樂番畀觀眾」
Q6：Leon先生，想問你百年歸老時啲錢點樣使呀？會唔會畀你老婆同啲仔女呀？
黎明：我百年歸老啲錢點使？人應該正常嚟講人愈大使嘅錢愈少嘅，咁後生時能夠使嘅，恰當嘅咪使吓囉，唔係叫揮霍嘅。你覺得我賺嘅錢好多，其實好多時候會投資番落呢行，始終我嘅錢係大眾畀我，我都會做番啲娛樂嘅嘢，提供番畀觀眾囉！事業心啦！幾樣嘢加埋都有嘅，百年歸老後點？我都冇諗過呢個問題，諗太多唔好。
Q7：請問你會唔會再結婚呀？離咗婚？
黎明：會唔會再結婚呀……離咗婚！我諗好難講o架，你咬死話唔再結婚，可能將來又結婚，你話好希望結婚，可能上帝又話成日恨呢樣嘢，咁就畀多啲磨練你先，等你80歲先結婚，但結完婚之後可能第二日就重新投胎，真係冇人知，所以都係隨緣啦！
爆金句「反映第二個意思」
Q8：我想問吓黎明，你有咁多金句，有冇諗過出書，或者開棟篤笑？同埋邊句金句，你係最鍾意？
黎明：冇諗過開棟篤笑，亦冇諗過寫金句！其實我諗唔係金句，我諗本身可能我北京出生，咁喺北京出世嘅小朋友，大家喺胡同裏面、四合院裏面，好多小朋友說話入面都好多文句式去反映第二個意思，習慣咗嘅時候有呢個基因，變咗嚟咗香港，可能潛台詞有呢個基因，其實有好多一句句子裏面有第二個意思嘅，會加強咗明白嘅，亦都有時咁樣可能我自己性格直接，但我返到北京啲人話我講嘢太直，有好有唔好，其實在乎你邊度出世，環境好在乎影響你嘅吸收力，而吸收力變咗做人講嘢方法同理論呀、思想呀，影像表達未必明，但個意思應該喺度嘅，如果完全唔明，你哋都唔會認為係乜句物句啦！
Q9：黎生，你話你唔會空肚食早餐，咁你食早餐之前，會食啲咩呀？
黎明：唔知啲人點解會話我唔會空肚食早餐，不過，空肚食早餐呢樣嘢，通常朝早起身都會飲杯水先啦，肚好啲啦，飲啲水。我唔知點解有呢句說話，呢句說話我好似冇刻意講過，可能畀人扭轉咗嚟講。
煲韓劇？「依家睇歐美劇」
Q10：黎生，你仲可唔可以重演當年嗰句經典嘅廣告對白呀？「May，你點呀？」
黎明：May……你點呀……！
Q11：黎生，你平時喺屋企鍾意做啲乜嘢o架？會唔會煲劇呀？好似韓劇咁樣呢？
黎明：我唔煲韓劇o架，因為……我冇呢個習慣，睇韓劇我以前有睇過，可能我會早啲快啲，依家睇歐美劇會多啲。
唔係男神「我只係凡人」
Q12：Leon我想問你，邊個係男神同埋女神，同埋覺得自己係咪男神呢又？
黎明：唉……我就絕對唔係男神，我就係凡人！你心目中覺得邊個係男神，你就將佢貼張相喺床頭、廁所啊對住佢啦！但都唔會出現，神又點會出現人面前呢！
Q13：Leon我想問你呢，我同男友好想上車（買樓）啊，點樣可以快啲上到樓呢？
黎明：買樓嘅地方你要計一計囉！如你想買樓呢個係一個意識，你覺得一個保障，但有冇諗過你搵嘅錢用嚟租樓嘅時候，你可以不停可以換，如果啱自然買到樓，點解唔租？一定要買呢？一定要供？一定要做供樓奴隸呢？呢個唔係好明，係咪先！有時諗上海咁貴，但買咗幾可會住，一間800萬嘅樓，可能一年先去一次住五日上海，你住最靚嘅酒店使你幾多錢，其他錢可以做其他嘢，點解要將800萬放喺上海嘅樓上面，呢個係我嘅睇法，每個人對錢睇法不同，視乎你滿唔滿足，你同男友一齊最緊要個地方令你開心啫！開心工作順利自然會有機會，買到你想買嘅樓啦！
想做爸爸？「呢分鐘我唔會」
Q14：Leon有錢又靚仔，又係筍盤，你揀女友有咩條件？
黎明：其實我揀女朋友冇乜條件，睇緣分咋！因為我工作時間太長，同埋唔係好識得分配自己時間，成日做嘢。我諗如果狗仔隊唔再影我哋藝人時候，我哋私人時間可以出去行吓街，咁自然就有機會識到女仔，但通常未識到已畀人影咗相拎去賣錢，咁係嘛！咁出呢啲雜誌報紙老闆自己繼續去拍拖，對我哋啲藝人係有啲唔公平，咁唔好影等我哋自己上fb登出嚟。
Q15：你幾時做爸爸呀？幾時想呀？
Leon；你抱住小朋友就問我幾時做爸爸，我冇抱小朋友！我覺得做爸爸都要睇緣分嘅，即當有小朋友時你嘅工作完全Handle到又照顧到小朋友，跟住先去照顧，因為好大責任嚟，尤其是始終每個人命運唔同，唔係爭唔爭取，如果爭取完你個婚姻唔係咁長遠嘅，咁到時當多個仔多個女都可以Handle，始終生活喺亞洲唔係美國，變咗隨緣啦！有我都唔抗拒，但呢分鐘我唔會囉！
後記：10分鐘 Tell You Something
記者與黎明做專訪，有一種衝鋒陷陣嘅感覺，腦筋反應最好有1000M極速光纖速度，才可以應付到黎天王的精妙對答。當日，黎明工作表排到滿，拍攝《黎明話你知》只有黃金10分鐘…嘩…10分鐘，食個麵、飲杯茶就完啦！不過黎天王以經驗「話你知」，佢係做到嘅！由埋位將幾十條問題一一答完，再拍埋Slogan啱啱好，最抵死的是他將節目名《黎明話你知》翻譯埋英文名「Leon Tell You Something！」金句王確係好Funny。