陳逸璇串燒三拍檔 重踏崎嶇音樂路

飲酒猜枚啟發樂隊名

猜拳「15 20」玩得多，Jolie的樂隊名也正是由此而來，他們的音樂信念與玩「15 20」一樣，就是帶給別人歡樂，傳播快樂種子。

Jolie：「我哋嘅樂隊包括我有四名成員，我係主音，Marcus係結他手、Ricky係琴手、Nate係鼓手。我同Nate識得最耐，識咗近兩年，去年五月第一次四個人合作，當時有人邀請我去澳門表演爵士樂，係Nate幫我搵埋其他人一齊演出，第一次合作已經覺得好有火花，好有默契，於是就開始一齊做更多表演。樂隊喺九月正式成立，樂隊名『15 20』係大家一齊諗，呢個飲酒遊戲相信大家都識玩，通過遊戲可以聚集到一班人同帶畀大家歡樂，仲由香港傳到去世界各地，希望我哋樂隊都可以做到咁。」

黃樂其（左起）、黃彥康、陳逸璇和何兆為組成樂隊「15 20」，彼此默契十足，絕無拗撬。	結他手何兆為是熱血band仔，爆炸力十足。	「15 20」練習時一絲不苟，甚為投入。

作曲填詞樣樣得

Jolie：「樂隊成立絕對係機緣巧合，我好幸運，佢哋三位係我嘅幸運星。我一直有唱歌，可能大部分樂迷唔知道，因為我係唱爵士樂，近五、六年間我同好多音樂人夾過演出過，直至遇到佢哋三個先有組成一個樂隊嘅念頭，覺得上天自有安排，我好感激。我哋喺音樂同性格上都好合得來，從來冇任何爭拗，Marcus係媽媽嘅角色，佢會催促我哋做嘢；Nate同我性格最似，大家都傻更更、鍾意玩；Ricky音樂造詣好高，佢嘅意見大家會聽，所以我相信將來都唔會有任何爭拗。我對呢個音樂班底好有信心，我哋全部都係全職嘅專業音樂人，所有歌曲都由我哋一手包辦，Ricky負責作曲同編曲，我負責作曲同填詞，每首歌都係我哋自己嘅故事。佢哋除咗有好深嘅爵士樂造詣外，亦幫過好多流行歌手嘅演唱會做演奏，舞台經驗豐富。」

琴手黃樂其精於古典樂，是年紀最細的成員。	陳逸璇在樂隊中除了擔任主唱，並會親自作曲和填詞。	鼓手黃彥康最鍾意rock及pop music。

三子各有專長

Ricky：「我係全隊最細，七歲開始學鋼琴，對好多音樂種類都有興趣，由最開始學classic，之後自己彈爵士樂同流行音樂，亦有玩電子音樂，中學有夾過band，亦有作曲，但唔係好熱血嘅band仔。」

Marcus：「我係熱血band仔，但真係認真玩音樂係最近10年，有讀音樂，依家全職做音樂。」

Nate：「我打鼓打咗15年，喺美國長大，喺美國嘅音樂學校讀書，我係聽爵士音樂大，都鍾意rock同pop。」

香港製造向世界出發

樂隊成立日子尚短，然而每次演出都獲好評，他們也野心勃勃，希望將香港製造的音樂帶向全世界。

Jolie：「我哋成立嘅日子雖然短，但喺冇經理人嘅情況下，已經做咗幾個大型嘅騷，喺紅酒節、爵士樂節同單車節入面表演過，反應都好好，仲有幾間經理人公司向我哋招手，預計今年會推出唱片，我哋現時以英文歌為主，之後會創作國語同廣東歌。雖然我哋會做番主流樂壇需要嘅宣傳，但音樂唔會偏離依家嘅路線，主要走Pop Electric Jazz風格，結合流行歌曲、電子音樂同爵士樂元素。我知香港樂壇競爭大，每個行業要成功都有一定難度，所有事都要全力以赴，有好機會就要盡自己能力做到最好，唔好灰心，去堅持追尋自己夢想。我哋會先做好啲歌，得到樂迷及樂壇人認同，終極目標係代表香港去世界各地舞台演出，將香港製造嘅音樂帶去唔同國家。」

後記

有人問由倫敦去紐約，用甚麼方法最快？你可能會答修橋、築路、搭火箭……甚至隨意門，但原來最簡單是找伴侶陪你走。音樂路從來不易行，十年前Jolie孤身上路，十年後，身邊多了三位夥伴，路不會因而變得平坦，但至少有動力走下去。

場地：La Paloma、Flower Music

服裝：Cheap Monday、Per Suit

髮型：Nelson@ Hair Salon

文：陳嘉敏

攝：吳文聰