陸浩明試大床女友陪Un
近年過檔無綫做主持的陸浩明（6號），人氣與騷價齊齊「三級跳」，更年賺300萬元，年屆36歲的他日前約埋索模女友搵樓「試婚」兼試大床，心情勁High的他跳上床狂Un試性能！
「靠把口」愈撈愈掂的陸浩明，自2012年獲恩師余詠珊提攜由有線過檔無綫發展後人氣急升，夥拍肥媽主持的《食平D》系列甚受歡迎，騷價「三級跳」帶挈年賺300萬元。異性緣不俗的他早已「私藏」一名模特兒女友Ayan Chan，更已拍拖約四年。Ayan的外形省鏡，貌似台灣女星吳佩慈，同樣擁有45吋長腿及九頭身比例！早前在活動上，陸浩明表示與女友感情穩定，正努力儲老婆本望兩年內結婚！據知，收入大增的他最近搵樓「試婚」，故日前急不及待相約Ayan到銅鑼灣一所傢俬店，睇定家具和到地產搵樓。
由於兩人同屬高瘦一族，並肩而行時猶如一對筷子行街，頗為矚目。陸浩明與女友邊行邊耍花槍，無厘正經的他以隔水罩笠女友頭，又以湯殼及鑊剷「襲擊」她，逗得Ayan邊避邊笑，完全沉醉愛河旁若無人！其後，兩人行到床舖售賣部，陸浩明即衝向一張雙人床，並興奮地坐床邊狂Un試彈力，怕醜的Ayan只在床邊陪坐，被愛郎的「高潮樣」氹得哈哈笑。兩人轉戰揀枕頭又玩一輪，即場上演枕頭戰！離開傢俬店後，陸浩明與女友急急往天后睇樓盤，還與Sales到附近的樓盤睇示範單位，希望「試婚」之愛巢既舒適兼交通便利。
肥媽諗定豪送龍鳳鈪
有份帶挈契仔升呢的肥媽，激讚他吸金有道：「有人開門畀佢，佢都要有才華先搵到。」她又笑言若對方結婚，必定會送上龍鳳鈪，又讚「準新抱」好乖：「佢好純品、又靚，我畀99.9分！」
對於升呢「吸金主持」，陸浩明受訪時坦言有賴公司提供機會及肥媽賞識：「好多人話我喺《食平D》系列度做下把位好慘，但我完全唔介意，咁觀眾先會咁錫我。」對於睇樓及傢俬似為結婚準備，他直言年紀不小：「我都36歲！我細佬今年都結婚，所以我結都係出年嘅事，試婚先啦！（肥媽買龍鳳鈪畀你？）佢真係咁講過！女友仲講笑話遲啲係咪會打埋三五六隻金豬，我就話咁就最好。」問到一年穩袋300萬，他坦言沒有認真計過，但今年的確進帳不少：「係爭層樓，如果肥媽幫埋我『上車』就完美。」
文：影視組