肥媽重視家人退休歎世界

殿堂級歌手肥媽早前宣布會光榮退休，將於3月18、19日假紅館舉行兩場告別演唱會《肥媽友誼長存30周年演唱會》，為其歌唱生涯留個美好回憶。她透露邀得一大班老友做嘉賓，亦有朋友自動請纓，就算未能演出都會前來支持。肥媽希望台上台下都有朋友，齊齊開P共度歡樂晚上：「得到好多朋友支持，但今次感受特別大，因為切切實實咁感受到朋友好錫自己，未開始籌備已經覺得好感動。」她笑言今次終可放手將所有籌備工作交給同事處理，真正做回歌手，盡情享受舞台。

驚老公搵第二個陪

肥媽透露演唱會後將退休，因幾個月前哮喘入院，感覺精力一年不如一年，加上以往沒有時間好好陪家人，更笑言自己唔等錢使：「老喇！我老公行得走得，又fit，依家仲揸緊電單車、揸緊四驅車、打緊golf周街去，我唔陪佢，容乜易有人陪佢呀？」她認為這幾年是享受四代同堂及跟老公相處的黃金時間。

以前左耳入右耳出

問到何時萌生退休念頭？肥媽直言老公近年經常勸她退休，但以前總是「間歇性失聰」。她笑謂：「自己成日左耳入右耳出，但最近我奶奶同個妹就好認真咁同我傾，係時候唔好畀自己咁辛苦。」談到擔不擔心退休後會心癢癢？肥媽即耍手擰頭，指如果是慈善活動或較輕鬆的工作都會考慮，但登台或長期拍節目就一定拒絕。最後，肥媽有感而發表示現階段家庭才是自己的number one，計劃完成演唱會後會與家人遊山玩水，真正享受人生。

Make Up：Jeff Tang

Hair：Calvin Chan @M.i Salon

場地：The Mira Hong Kong

文：音樂組

攝：黎志輝