周秀娜鄭欣宜文凱玲為愛變小女人

周秀娜、鄭欣宜及文凱玲日前於九龍灣為電影《iGirl夢情人》作宣傳。正所謂「三個女人一個墟」，她們一碰面即雞啄唔斷，低胸現身的欣宜更不時chok出性感甫士「搶鏡」。她們雖然於戲中飾演不懂人類情感的機械女友，然而眾人卻力稱於現實中絕非機械人般「硬蹦蹦」，反而屬於「嬌嗲型」女友！

最冧才子

當中大搞內衣生意及設立個人工作室的周秀娜恍如女強人，但目前單身的她開腔透露獨愛才子，更大爆面對男友即變「小鳥依人」：「佢要有才華，可以教我睇到世界更多嘢，咁就真係好man呀！（變小女人？）好難想像係咪？如果搵到一個想保護你又有安全感嘅人，就自然返到去小鳥依人狀態。」而同樣單身的欣宜笑言會瘋狂撒嬌去「嗲爆」另一半。至於文凱玲稱在男友面前會「減齡」變細妹：「我平時畀人大姐姐嘅感覺，到時會變番妹妹！」

周秀娜獨愛才子，希望透過另一半增廣見聞。

欣宜「冧爆」林子聰，更自覺與對方天生一對。

唔會減產

談到三人於戲中分別與鄭伊健、林子聰及何浩文談情，當中與子聰飾演一對的欣宜更開玩笑稱與對方「相逢恨晚」：「我哋簡直天生一對，但原來佢結咗婚，好失望！」

至於多次與何浩文扮演情侶的文凱玲就笑言不敢「呻悶」：「次次都係同佢一齊。（嫌悶？）唉！唔會，佢都好靚仔。我唔咁講就驚畀佢啲粉絲鬧！」提及周秀娜近期似有減產之意，問她是否希望把重心移至生意上？否認的周秀娜直言享受拍戲：「我一路興趣都係拍電影。（以為你轉去商界？）唔係，我好鍾意喺片場！」

周秀娜髮型、化妝及服裝：Amber Tse@Alchemy、Circle@ND&Co.Co、Club Monaco

鄭欣宜髮型、化妝及首飾：Milk Chan@Xenter、Marsha@江中平化妝室、@caty

文凱玲髮型、化妝及服裝：Tin Ngai@Headwork.HairCorner、Cobia Cho、noveltylane.com

場地：EMAX

文：影視組