蕭正楠讚女友「幫得手」再搞家族遊

藝人蕭正楠昨日於九龍城拍新劇《幕後玩家》外景，劇情講述演麵店太子爺的他到麵店幫忙。現實中亦是孝順仔的他，去年帶媽媽與女友黃翠如去日本旅行，笑言「養大媽媽胃口」：「佢睇完電視話想去澳洲，下次帶佢去！」問到翠如會否同行？他謂要就時間，直言翠如「幫得手」照顧其家人。談到劇集《師奶Madam》為兩人「定情劇」，而《幕後玩家》會否成為「訂婚劇」？他笑笑口謂：「唔識答喎，開完呢套可能有下一套劇呢，大家都鍾意工作，再諗啦！」