黃伊汶誕7磅陳真
恭喜恭喜！35歲黃伊汶前晚剖腹誕下7磅猴仔陳真，由於比預產期早了大半個月出世，令身在北京出席電影首映的演員老竇陳國坤急急返港，一落機即飛撲醫院探太太及囝囝。黃伊汶急不及待將B仔樣上載社交網分享喜悅，廿四孝老公的陳國坤激讚老婆勁fit。
藝人黃伊汶（Emme）於2014年10月在峇里下嫁演員陳國坤（小龍），翌年中宣布造人成功，雖然Emme曾透露會於本月底或下月初擇日開刀，但原來前晚已秘密入住養和醫院兼剖腹誕下7磅重B仔。身在北京的小龍得悉囝囝快將出世，於《葉問3》首映中途漏夜飛返港直奔醫院。問他心情如何？他說：「好興奮。（改咗名未？）叫陳真。」
獎盃贈老婆
小龍離開醫院時難掩喜悅地說：「心情難以筆墨形容，開心到不得了。我個仔真係好靚仔，但因為啱啱出世，所以未睇到似自己定黃伊汶。」更與Emme分別在社交網分享由他操刀影囝囝的最新照片。Emme、陳真兩母子與數字「1、3」非常有緣，Emme是1月3日生日，囝囝則是3月1日出生。
小龍昨日手執鮮花再到醫院，再問他覺得BB似誰？他說：「似媽咪多啲，皮膚同眉粗獷啲，整體似媽咪。（餵人奶？）係呀。」並透露醫生指太太要留院4至5日。問他如何獎勵太太？小龍說：「造咗個獎盃畀佢，都不斷畀suprise佢。」
有六舊腹肌
小龍為陪太太坐月，將工作押後：「本身3月要開工，但同劇組講咗。覺得坐月好重要，無論精神同身體上都會支持。」問到太太狀況？小龍激讚：「佢好勁，同未生之前差唔多，仲好fit。」身為好姊妹的鄭希怡（Yumiko）、何嘉莉及谷祖琳（小谷）紛紛到醫院探望Emme。Yumiko讚陳真靚仔：「一出世就有六舊腹肌。」小谷則表示未買禮物，問她會否做陳真契媽？小谷說：「唔係我決定。」
採訪：音樂組、追蹤組