大宇啟華蘇康 20年火力開騷引爆

吳：吳啟華 陶：陶大宇 蘇：蘇永康

識於微時

廿年同學同期出道，同是男一的吳啟華和陶大宇，最近在鄧特希新劇《隱世者們》合作而被傳爭戲份鬧不和！

吳：我同大宇幾十年兄弟，廿年前《皇庭》冇乜對手戲，今次《隱》劇正式合作，其實好難得，仲傳話我同大宇不和？做咁耐同學，嗰份感情好真摯o架！

陶：喺觀眾心目中，我同啟華都各有位置，更何況我哋係同班同學，嗰份感覺同新相識嘅演員係冇o架，特別有共鳴！我仲記得以前好窮，試過同啟華喺後巷食黃豆送麵包！有錢嗰日，咪一齊去飲茶囉！同撈同煲，同啟華感情要好外，仲跟佢爸爸去釣魚，感覺就好似一家人！

吳：咁大宇本身個人係好親切嘅，佢嘅笑聲感染到好多人！不過我幾幽默o架，可能我向來角色比較斯文，你哋畀我迷惑咗啦！其實我係好動型，日日跑步做運動，依家拍戲都有動作，唔想咁易扭親，咪當練下身手囉！我同大宇都戒咗煙，所以更加需要運動，唔係好易肥！

陶：見啟華拍《隱》劇好好身手，真係睇唔出，佢以前形象較書生，依家好多動作都親身上陣！仲有樣嘢估唔到呀，我同啟華傾開偈，原來佢打算做導演（口架）！

吳：小生仲可以畀你做多幾多年？所以拍戲以外我咩都會諗吓，我又唔想咁早退休！

陶大宇追求開心生活，要過有得選擇的人生！	吳啟華直言期待與舊同學合作！	陶大宇有份主演經典劇《壹號皇庭》。

三男講到興起，笑言好想開Talk騷！	陶大宇大讚好友蘇永康好有義氣，要幫忙一定撲出嚟。	吳啟華直言與前妻石洋子及愛女關係keep得好。

不婚秘密

識於微時同是失婚男的啟華和大宇，對單身男的生活相當享受，啟華面對大宇開朗的笑聲，不期然豁出去自爆不婚的秘密。

陶：照顧囡囡都好花時間，話晒係你上世情人！哈哈……

吳：個囡都成日要見o架，早排去日本拍《隱》劇，都攞多幾日假陪個囡留低玩，囡囡都有自己世界，佢好多嘢學，有時仲忙過我！

陶：單親爸爸都辛苦？

吳：前妻都有照顧個女，我哋保持聯絡，最近我同大班朋友去美國玩，前妻都有同行，其實我哋關係都Keep得幾好！始終佢係個女嘅媽咪都係親人，呢世都唔會變！不過，要我再婚就唔好啦！冇老婆個生活幾好，冇人管住我，好多朋友話要介紹女仔我識，都唔抗拒，但只限於拍吓拖、神交吓，大家都唔好咁緊張要結婚！

陶：再搵另一半有咩要求？

吳：最緊要溝通，年紀唔係問題，以為一樣大就好咩？好似阿媽咁，點行出嚟呀！

陶：人生最緊要開心，我好簡單，只要每做一件事，有得畀我選擇就已經好滿足，即係話我鍾意可以做，唔鍾意可以唔做！

捱得開心

愛享受的啟華，有錢豪使，冇錢和老婆捱五蚊一舊魚亦一樣開心。

吳：我都覺得大宇份人好簡單，佢似一個冇咩追求，唔會奢求啲咩享受嘅人！

陶：都有要求嘅，當我好有需要時，靚得起，有興致時，我食得起就夠啦，我會豪擲過萬元去食餐飯，都係求個開心！不過，講到着（衫）講究，企喺蘇康旁邊，就着乜都輸啦！

蘇：我貪靚嘛……不過有樣嘢我好記得，啟華係好明顯唔肯食飯盒o架！佢好講究！

吳：我係好捨得使錢，但當我窮試過同老婆（石洋子）去街巿買舊五蚊嘅魚做餸！

陶：你哋呢啲叫做情趣啫！

蘇：其實啟華真係好鬼得人驚，佢喺食方面好誇，食公仔麵都要加鮑魚，午餐都有鮑魚、大蝦……四餸一湯，撞鬼咩！

吳：慳嚟做咩呀！做得咁辛苦為乜？

陶：咁又啱！使到就資產，使唔到嘅就係遺產！唔好咁嘥！哈哈……

義氣仔女

重友情的蘇永康，寧願搵少啲錢，都希望與老友重聚接拍《隱》，並認為這個《皇庭》班底，再加主腦鄧特希可以開Talk騷繼續合作，發光發熱！

蘇：今次《隱》劇呢個組合係令我接拍原因，加上鄧生（鄧特希）叫我做嘢我都從來唔托手（月爭），冇鄧生套《妙手仁心》阿嬌個角色，蘇永康喺電視界係冇成績。依家喺公司角度，做兩場商演好過拍一套劇，但我覺得呢個班底好難得！

陶：康記個人好有義氣，《皇庭》之前仲一齊去蒙古拍《成吉思汗》，好好朋友，我之前拍有線個飲食節目，叫佢做嘉賓，康記喺杜拜都第一時間覆我，撲出嚟幫我，我都好感恩！

蘇：見證住大宇變師奶殺手，當年拍《皇庭》收咗工都仲去茶餐廳食嘢，有次傾佢走紅嘅心態轉變，應該點去迎接呢個春天，大宇好好笑o架，好鍾意面對群眾，話Test有幾受歡迎喎！我哋個班底出去搵食，開Talk騷相信都有巿場！

陶：嚟個大突破囉！你做講，我嚟唱！加埋鄧生個腦，修飾我哋平時啲對話，咁多套《皇庭》啲抵死嘢，都會幾好笑！

陶大宇服裝：Harrison Wong

文：影視組

攝：張福宏