龔嘉欣黐仔「取暖」陳芷尤怒睥

處境劇《愛．回家》快將完結，日前在將軍澳電視城拍攝齊人跳舞煞科戲，近百藝員包括黃翠如、張繼聰、黎諾懿、蔣家旻、劉丹、郭少芸、麥包、龔嘉欣（Katy）及張振朗等捱冷起舞，衣衫較單薄的藝人更凍到縮縮吓！

堪稱「新一代發電機」的Katy身穿短裙仔，不停黐仔「取暖」，先獲張國強（KK）揭開西裝為她擋風，Katy扮作依偎其懷中，KK即High爆作狀來個「叔叔抱抱」！其後Katy又氹得人夫黎諾懿即席教耍功夫，冧仔果然有一手！

張振朗懶理正印
但Katy黐得最密的莫過於緋聞男友張振朗，兩人常細聲講大聲笑，振朗更突然踎低扮凍，引來Katy搞笑地起腳踢他。兩人旁若無人耍花槍，站在角落的振朗正印女友「新咪神」陳芷尤看在眼裏，愁爆扁嘴兼雙手掩耳，相當慘豬。

至於曾與Katy傳緋聞的吳業坤早前被降呢為「契細佬」，擺明冇機會。當日坤坤長駐最後排，與林師傑及譚嘉儀負責彈奏，全程跟Katy零交流。同場另一邊，已有男友的蔣家旻勁怕凍，不避嫌整個人貼實「阿哥」羅天宇取暖。

陳芷尤眼見男友玩得開懷嬲到眼凸凸但仍只隔遠觀望，認真忍得！	龔嘉欣輕易氹得人夫黎諾懿大擺功架耍兩招。	龔嘉欣冧掂張國強為她擋風。

坤坤酸爆恨拍拖

眼見Katy勁風騷，坤坤直言遺憾於戲中未有感情線就完劇。問到會否妒忌Katy與振朗在劇中拉埋天窗？他說：「唔會嘅，只係自己都想發展吓感情，希望之後有機會啦！我想用毒男形象拍吓拖，相信幾有趣！」

此外，一眾《愛》劇藝員前晚在電視城舉行煞科宴筵開11席，Katy與坤坤受訪時直言感不捨，她眼泛淚光說：「我好眼淺，大家見面仲多過見屋企人，佢哋成日整喊我，但係又會講心事。」近日發燒入院的Katy透露仍未痊愈，但已退燒，其後會跟黎耀祥飛往美國登台，問到聲沙沙可會影響演出？她說：「唔諗得咁多，會太大壓力，之前都有練歌，吳業坤仲錄咗啲Demo教我唱歌。」坤坤亦表示不捨得劇集完結，但最開心是終可剪頭髮轉新形象。

文：影視組