沈卓盈堅持自我 唔憂冇人要

抱寧缺勿濫心態

踏入30歲後，單身的Jessie加入黃金盛女一族，有樣有智慧的她絕對唔憂嫁！Jessie更銳意趁後生在事業上盡情搏殺，生活上亦毋須憂柴憂米。

「我拍拖嗰陣完全係做自己，要畀佢知我真正一面係點。我一直都直腸直肚有嗰句講嗰句，就算見家長都好，長輩係一定要尊重，但亦唔需要特別做啲嘢嚟討好，對人最緊要係夠真，我相信佢哋會感受到，咁大家嘅相處會更加輕鬆同自然。如果我好拘謹好作狀嘅話，嗰個已經唔係我，我都想人哋見到我真性情，接受最真嗰個我。」

「現階段single但唔會心急，我一直都係抱住寧缺勿濫嘅心態，未遇啱我會選擇等待。我好相信緣分，雖然呢句說話好老土但好啱用，緣分到嘅話自然會有個適合你嘅人出現。揀男朋友會着重個性，好睇佢嘅品格，呢樣嘢代表晒你成個人嘅人品、思維，其餘嘅唔係太差都OK啦，最緊要大家思想溝通到先，價值觀要似先可以見到兩個人嘅將來。」

「長腿姐姐」沈卓盈曾憧憬婚姻，但年紀漸長，覺得要趁後生努力工作，感情事則隨緣。	沈卓盈是開心果，能夠帶動拍攝現場氣氛。	與好戲前輩湯鎮業合作，令沈卓盈獲益良多。

沈卓盈於《刀下留下》由王后演到瘋婦，絕對考驗演技。	沈卓盈於《刀下留下》由王后演到瘋婦，絕對考驗演技。	為保白滑肌膚，沈卓盈很注重健康飲食。

「一見鍾情以前會信，依家唔會喇！所有嘢都會停一停，諗一諗先。我都唔係十八、廿二啦，衝完之後唔知會點。我都係女仔嚟，都有想像過理想中嘅另一半係點，8歲就開始諗。依家大個咗就唔會成日諗拍拖，重心都放喺工作度，應該build up自己事業，目標要清晰，工作、愛情都經營到先係一個成功嘅女性。」

求突破想搞生意

繼去年的《梟雄》及《刀下留人》後，Jessie將會參演新劇《火線下的江湖大佬》，更與幾位自己十分欣賞的前輩鬥戲，她直言獲益良多。對於將來發展大計，除了繼續在演技上求變求突破外，她亦想嘗試搞生意。

「喺《火線下的江湖大佬》同苑仔（苑瓊丹）、亮哥（黃光亮）合作，全部都係super前輩級嘅人。好鍾意睇佢哋點演戲，好想喺佢哋身上學到敬業樂業，成為更出色嘅演員。今次我會做一個madam，但係唔需要捉賊，反而感情方面發揮多啲。同楊明、陳山聰、岑麗香有感情瓜葛，大家差唔多年紀拍得好開心，個角色亦好輕鬆，好貼近我本身性格，成日嘻嘻哈哈好樂天。」

「嚟緊都想試多啲唔同角色，好想遇到一個好角色去發揮。上次《刀下留人》做癲婆已經試咗，依家想做吓專業人士，好似律師、醫生。好多身邊朋友都話我係大笑姑婆，所以輕鬆喜劇我都想試，想一路進步，想演出一次比一次好。搞生意我一路有諗，最想做時裝或者美容，做生意始終應該做番自己鍾意嘅嘢先會成功，時間嘅話就anytime都想實行，如果有心做幾時都做到，不過開始前最重要係準備好所有嘢，我本身都係安排好晒所有嘢先會行動嘅人。」

戒澱粉質保健康

Jessis皮膚白滑，身形亦相當弗，原來她的心得是「識食亦識減」，收放要自如。她直指皮膚對女人相當重要，亦是做藝人的本錢之一。

「一年一年咁大，新陳代謝實會慢咗。依家我夜晚戒澱粉質，以瓜瓜菜菜為主，食多啲生果同飲多啲水，愈簡單就愈健康。同埋一定要飲湯，飲湯對滋補好有用，媽咪成日會燉百合畀我飲，清潤滋陰，成日飲都冇所謂，如果捱夜捱得多又會燉吓冬蟲草。」

「有時做嘢少不免喺外面食飯，食多咗的話咪之後兩日食清啲。我覺得有時做人唔使太過苛刻，有時可以放縱吓，但係識食時亦要識減，可收可放先係最開心。一次過戒得太過清，情緒都可能會平衡唔到。我好鍾意食甜品，甜品對我嚟講係主菜唔可以缺少，最多之後跑多幾個鐘減番。」

「女仔嘅皮膚保養好緊要，我一日會敷兩次mask，習慣朝早洗完面就敷塊mask上去，一路睇書都敷住。夜晚臨瞓前我會再敷多次paper mask，等皮膚吸收多啲水分，第二朝上妝望落都水潤啲。香港啲天氣幾日潮濕幾日又乾燥，敷mask呢個程序一定唔少得，千祈唔可以偷懶。」

後記：爽朗性格 人見人愛

Jessie在訪問期間不時哈哈大笑，坦蕩蕩展現真性情，令記者和攝影師都在輕鬆氣氛下工作。拍攝時，她亦不時詢問攝影師意見，並即時查看相片效果，務求讀者看到她最完美的一面。當她看到滿意的相片時，亦毫不吝嗇給予稱讚及鼓勵，可愛又爽朗的性格實在討人歡喜。

文：陳丹　

攝：劉斌

場地：Gaylord Indian Restaurant

髮型：Ron Ng@HH hair‧nail