顧嘉煇搵許冠文代言Talkshow搞笑
一連兩場的《顧嘉煇金紫荊慈善演唱會》昨晚假紅館開鑼，樂壇教父顧嘉煇率領多位巨星助陣，如鄭少秋、汪明荃、張德蘭及區瑞強等，而薛家燕、趙雅芝夫婦等則來捧場。甫開始身穿黑色西裝的的顧嘉煇由徒弟徐日勤扶住出場行到台邊，現場觀眾熱烈歡呼，當師傅坐好後，徐日勤就上台指揮。
之後現場播出以《獅子山下》為背景音樂的片段，顧嘉煇更大開金口指歌曲陪伴香港人成長，希望用音樂回饋社會，更介紹好友許冠文出場指：「佢同我一樣對香港有深厚嘅感情，佢寫嘅《鐵塔凌雲》同我寫嘅《獅子山下》係最好嘅見證，今晚特別請佢為我代言，演繹我哋嘅香港情。」
張德蘭透視獻唱
隨即任司儀的許冠文上台，他更大講六分鐘talk show，表示希望今晚藉顧嘉煇的金曲回憶和分享情懷，亦謂顧嘉煇性格特別，其中又談到對方被傳死訊事件：「佢同我講話之前有議員話佢上咗天堂，有冇搞錯，梗係啦，我同佢講你喺海報話我係你代言人，通常上咗天堂先會搵代言人。」
另他提到當年二人是《歡樂今宵》同事：「我同佢講我想做歌星，佢聽完就彈我歌喉，叫我講笑好啲，好彩我聽佢講，之後做咗導演，到後來《天才與白痴》同《鬼馬雙星》搵佢做配樂，煇哥反轉同我講想試吓做明星、想演戲，我就喺《天》搵個角色畀佢，佢問我做得好唔好，我就話佢做番音樂好啲，好彩佢聽我講，如果唔係就冇《獅子山下》。」之後許冠文下台時走錯方向，要工作人員提醒，然後輪到身穿透視裝的張德蘭出場獻唱。
文：音樂組