徐子淇掛住湊仔老公呷醋索抱
「千億新抱」徐子淇坦言自己的心已被孻仔李建熹溶化掉，每天只想留在家中抱着囝囝。她更大爆老公李家誠呷囝囝醋，要求子淇暫時放下囝囝，好好理會他。
徐子淇昨日穿上六吋高跟鞋及露肩裙出席活動，她透露新年舉家到了夏威夷旅行數天，到沙灘與海豚暢泳。她大讚幼子李建熹很好湊，在飛機上熟睡：「喺飛機上大昏迷，我中間有用手指睇吓佢仲係咪抖緊氣。」
怕寵壞BB
她透露家中三名子女不時跟弟弟玩，但弄哭了他便走開，主要由自己湊囝囝。她坦言自己的心已被孻仔溶化，每天只想在家中攬着他，直言「孻仔孻心肝」：「親戚同老公都怕我會縱壞佢，死火，不過真係好愛。」問到老公李家誠會否呷醋？她即冧爆地笑言：「有呀，我有次同老公一齊，我抱住BB，佢問：『到我未？』咁我就畀BB佢啦，點知佢話：『唔係呀，係你理我未？』」
生夠封肚
問她會否再生B？她坦言生B不困難，但教育他們要花很多心機及時間。她說：「今次開完刀之後，醫生同我講我仲生得，我問醫生開刀唔係最多四次咩？佢話仲生唔生得係睇個傷口，唔關開幾多刀事。我話唔好啦，唔使啦。（老爺李兆基有冇叫你再生？）佢話夠，佢好滿足有咁多小朋友同佢玩。」另外，她透露家中兩名女兒都喜歡演話劇，但二女卻不想做主角，只想做行行企企的閒角。
文：名人組