陳瀅慘豬出紅疹驚生上臉
無綫花旦楊怡、陳瀅（Jeannie）、雨僑、陳靜（DaDa）、苟芸慧、連詩雅、鍾浠文、洪卓立、湯怡及陳家樂等昨日出席活動。
「我都怕傳染人」
現場見Jeannie的手臂和背部皮膚出現一撻撻紅印，她直言皮膚敏感要入院求醫，後診斷是患上多種紅疹症，但未能確知成因，她說：「食藥食到個人好飄忽，行路都喘氣！醫生話之後會出更多（紅印），依家腳最嚴重，我都怕傳染人。（驚生到上面？）唔好呀！始終靠塊面搵食！」對於密友劉佩玥亦出紅疹，Jeannie笑言必定是對方傳染自己。問男友何猷亨是否心痛？Jeannie說：「同事仲心痛呀！呢個星期好多工作。」提到日前與猷亨及「四太」梁安琪欣賞麥當娜演唱會，離開時猷亨心急搵車，冷落在旁淋雨的Jeannie，Jeannie認為只是小事。
同場的楊怡被指因想結婚生仔將不續約TVB，心情大靚的她笑言身形瘦削絕非有喜。至於續約問題，她說：「冇話過唔續，傾緊，四月完約，要好好計劃，希望輕鬆啲，想每次見大家都精神奕奕，唔係好攰咁，年紀大喇！（有咩想爭取？）人工當然要開心，但想試更多唔同嘢，希望爭取到好機會。（覺得之前角色重複？）又唔係！但我希望演開心角色，拍吓喜劇，之前好多喊戲。」
「有婚期會宣布」
是否正籌備結婚？楊怡哈哈大笑，並賣關子說：「如果真係有開心事會同大家講，我都想承你貴言，有好日子會宣布。」對於有指鍾嘉欣有喜三個月，楊怡笑說：「係就當然開心！知道嘉欣鍾意小朋友，但應該唔會啩？」
文：影視組