王浩信炒車送院 頭暈照腦
藝人王浩信昨日在屯門拍飛車戲，期間「假戲真做」發生車禍，王浩信與特技演員撞上一部重型車輛，隨即因頭暈被救護車送往醫院。左眼皮「爆缸」的他說：「希望冇破相。」
無綫小生王浩信昨日偕郭晉安（安仔）現身屯門，為主演新劇《致命復活》拍攝飛車戲，劇情講述王浩信乘坐私家車，與駕駛者於車廂中打鬥，駕駛另一部車的安仔則緊隨其後。事前，王浩信表示劇組做足安全措施，他也會打醒十二分精神。豈料，期間卻「假戲真做」發生車禍，王浩信和特技演員邊開車邊打鬥，結果撞向在場一部重型車輛！王浩信於事發後手現血漬，工作人員即將他扶離車廂，並急Call白車。只見坐在一旁的王浩信一臉痛苦，不時要飲水、抖氣定神，安仔見狀也神色凝重地上前慰問。
最擔心就係破相
救護車到場後，王浩信於救護員攙扶下自行上車，當記者問到其身體狀況時，他說：「頭有啲暈。」隨後他被送到屯門醫院治療，幸臥於病床上休息的他仍清醒，更向記者詳述撞車經過與傷勢，只見他的左額和眼皮貼上紗布、右手食指亦包紮好：「頭仲有啲痛，稍後照掃描睇吓有冇撞親個腦，相信冇乜大礙，醫護人員話左眼皮輕微(界刂)開，事發突然，我都唔知個頭撞到邊度，搞到個頭腫得咁嚴重，希望冇破相。」
監製讚有責任感
王浩信既擔心受傷影響拍攝進度，又怕令家人擔心，事後也向太太陳自瑤和母親報平安：「我頂得住，希望快啲康復，令到家人擔心都好過意唔去，現實同拍劇都未試過撞車，好在傷勢比想像中好。」據知，電腦掃描結果顯示，王浩信未有出血或骨裂，待額頭消腫及再觀察後，需休息數天。
監製林志華昨趕往醫院探望，並說已取消所有場口：「當務之急係王浩信嘅健康最緊要，等做晒檢查、睇埋報告先，佢好有責任感，同我講唔想阻拍攝進度，公司都以佢健康為主。」談到3月初移師越南取景，他指以王浩信的健康為優先考慮，之後才決定會否再作變動。
文：影視組