王宗堯手口並用氹番女友
王宗堯與模特兒女友Christy經常晒恩愛，但日前在街頭因搵食問題鬧出小風波，兩人一度相隔幾個身位展開冷戰，冧女有一手的宗堯見勢色不對，即手口並用又搭膊又耳語，成功呵番女友！
37歲男藝人王宗堯與22歲模特兒女友黎紀君（Christy）去年10月因同遊日本而「洩蜜」，男神封盤後不介意高調晒愛，經常在網絡上載Sweet爆合照，更趁女友生日送上戒指，但原來兩人平日也跟普通情侶一樣，偶爾會出現小風波！
擰歪面隔得遠
日前王宗堯與Christy被拍到現身灣仔街頭，男方泊好車後便與女友商討去食飯醫肚，起初兩人恩愛拖手有傾有講，但其後進出多間食肆仍然不合心水，似乎達不到共識，兩人開始在街頭鬥鬧情緒，王宗堯頭耷耷面黑黑，拎起手機上網搵食肆，對女友不瞅不睬，Christy則翹起雙手兼擰歪面，兩人更一度相隔幾呎遠，冷戰味道甚濃！
快速變連體嬰
其後兩人步往取車打算轉到另一條街再搵食，年齡成熟一大截的王宗堯深知女士是要氹的，既然女友嬲嬲豬，當然要出招呵番，見他急步走上前拖住Christy玉手，又搭着伊人膊頭兼咬耳仔，手口並用非常落力，被甜言蜜語冧暈的Christy當堂火氣盡消，攬着男友腰部回敬，兩人「愛火重燃」，化身連體嬰繼續搵食之旅。
文：影視組
攝：追蹤組