甄子丹 雲狄素猛男愛家 「湊」味相投
「宇宙最強」甄子丹與荷里活巨星雲狄素（Vin Diesel）正於零下卅度的多倫多拍攝荷里活電影《3X反恐暴族3》。兩人首度合作，子丹大讚雲狄素親民之餘，更與泰臣一樣十分疼錫家人。而他跟雲狄素除互相研究劇本外，最愛談的便是「湊仔經」！對於外傳子丹取代李連杰參演，子丹直言跟李連杰是兩個不同的角色，並非誰取代誰！
出名錫老婆的甄子丹早前受訪時，曾揚言「同類人」總走在一起，繼與「愛妻號」泰臣合作《葉問３》後，子丹近期再跟另一猛人雲狄素（Vin Diesel）合作新片《3X反恐暴族3》（xXx：The Return Of Xander Cage，《3X3》）。雲狄素與女友Paloma Jimenez擁有三名子女，應了子丹所言是名副其實Family Man！
子丹昨於多倫多接受獨家電話訪問，笑談這位新拍檔，大讚對方親切、愛家：「我哋平時當然會傾電影劇本嘅嘢，因為佢亦係今次監製，大家都會希望諗到一啲嘢，令到世界各地嘅觀眾都喜歡。除此之外，我哋最喜歡傾嘅就係湊仔經，佢好錫屋企人，係一個Family Man，一個以家庭為重嘅男人，同我一樣都覺得拍戲還拍戲，家庭先係最重要！佢女朋友（Paloma Jimenez）都有喺片場，佢同詩詩都好好傾，都係傾屋企嘢。」
新打法似X-GAME
早前盛傳子丹將取代李連杰拍攝該片，一直保密的演員名單終由電影公司正式公布。當中除雲狄素、甄子丹外，還有森姆積遜（Samuel Ｌ. Jackson）、吳亦凡、Tony Jaa等，並澄清子丹並非取代李連杰。子丹受訪時亦指今次戲中角色，與李連杰原本談的角色不一樣，所以絕非取代。對於有這樣的誤傳，問子丹會否不開心？他表示：「唔會，最緊要係可以嘗試到一啲從未試過嘅角色。我覺得好開心，今次嘅打法好特別，好X-GAME。我同雲狄素將會上天下海咁打，係New Generation（新世代）嘅007！（有傳演反派？）邊個話係反派？但礙於要保密，不便透露詳情。」
Tony Jaa急「相認」
除雲狄素，子丹亦跟另一好打之人「拳霸」Tony Jaa合作，對方在新戲中演其手下。子丹笑言跟Tony Jaa首次在幕前合作，但原來廿年前曾跟對方共事。Tony Jaa首日開工已急「相認」，子丹才知道：「佢第一日開工就問我有冇去過Thong Krut（泰國一個地方）。我話廿幾年前去過拍戲，佢就話當時做緊茶水、武師一腳踢，當時見過我，好記得，今次見面講番。」因剛開工不久，子丹與雲狄素暫未有拍打戲，多數為文戲居多。而昨剛拍攝一場雲狄素講國語的戲份，子丹當然充當導師，笑讚對方很有語言天分，是個很聰明的人。
文：影視組