楊婉儀挑機 遭老公追擊
無綫藝人麥長青早前趁春節假期，帶子女到《東華慈善嘉年華》玩樂，期間巧遇前港姐楊婉儀一家四口，麥包與楊婉儀相識多年，兩人更曾合作拍劇，認真有緣，兩個家庭更一同玩「瘋狂碰碰車」。麥包之後轉戰掟公仔攤位，最終掟得「阿愁」公仔送給囡囡，楊婉儀與夫婿陪子女玩盡家庭式機動遊戲。
麥長青（麥包）的13歲細仔麥振瑋和16歲囡囡麥淳琳，在「瘋狂碰碰車」內聯手夾擊麥包，即使麥包開行Turbo左閃右避，最終仍遭連環撞。楊婉儀與10歲大女Hannah坐一部車，夫婿王瑞勳與9歲細仔Jonah坐另一部車，王瑞勳不停追着她們的車撞，兩家人碰碰撞撞，場面搞笑。Winnie笑說：「估唔到先生同仔咁暴力，我同先生平時唔打交唔鬧交，咁多年屈埋喺心，依家喺安全情況下一次過爆發出嚟，哈哈。」
習慣有商有量
Winnie自言平日放假都愛四合一周圍去，大讚機動遊戲適合一家大細，先後玩了雙層旋轉木馬、超級紐約滑梯和鞦韆樹。他們往欣賞英國皇家絕技團的演出時，對驚險演出，看得目瞪口呆。Winnie說：「我同先生都唔係嚴肅嘅父母，鍾意同仔女有商有量。頭先我同囡囡玩機動遊戲時，一路傾偈一路玩，好warm。」她表示工作人員感覺好溫暖和友善：「因為做慈善，唔商業化，覺得好舒服，唔好話小朋友，自己都好想玩埋一份。」
贏公仔氹囡囡
麥包爆子女非常細膽，囡囡麥淳琳極鍾意掟公仔，先後玩盡「迷你保齡球」、「奶瓶高手」、「爆破汽球」及「幸運金字塔」等攤位遊戲，贏得多件毛公仔戰利品。麥包玩「擊罐高手」時，為愛女贏得動畫《玩轉腦朋友》中的「阿愁」，還取笑淳琳似「真人版阿愁」。麥包說：「我嗰個年代有荔園、啟德遊樂場，依家都冇晒，啱啱玩木馬都勾起少少童年回憶，難得有嘉年華，所以帶啲小朋友嚟，畀番啲回憶佢哋。」
攝：劉智源