黃美棋甜蜜頂心杉 公開示愛
「宅男女神」黃美棋與主持兼樂隊主音鍾健威（Ray）傳出緋聞多時，她昨日鼓起勇氣於情人節公開認愛！美棋先在社交平台向Ray驚喜示愛，留言感謝男友成為自己的支柱：「你撐吓我時我又撐吓你，謝謝你成為我的支柱。」其後，美棋透過電話訪問直認拍拖兩個月，讚男友懂得照顧自己：「佢幾照顧到我同教我好多嘢，好似教女咁有耐性！（特登揀情人節先公開？）Sweet嘅日子做啲Sweet嘅嘢，佢起身睇到應該會好驚喜！」談到男方如何奪得芳心？美棋即怕醜說：「你哋問番佢啦！哈哈！」
男友靠把口奪芳心
至於Ray眼見女友於網上認愛，隨即轉發對方的發文，還甜蜜稱呼美棋為支持自己的「頂心杉」：「雖然有時硬得成碌杉咁頂住心口，但原來當我失衡傾側時，就是多得她頂住我心口，才不至倒下！多謝我的頂心杉，情人節快樂！」Ray受訪時自爆全靠口才追得美人歸：「好開心！係男仔做主動嘅，我靠開口表白，有諗過食檸檬，美棋都係隔咗一日先應承我。」提到如何度過首個情人節？Ray表示會帶蛋糕探女友班，一併慶祝情人節及人日，相當浪漫。
文：影視組