戴凱欣嫁硬：佢係好老公
四洲太子女戴凱欣（Kennis）與上海金融才俊樊林爽拍拖九個月，男友專程飛香港慶祝兩人首個情人節，兩人感情並沒有因異地戀而影響，反而愈見恩愛，還視對方為結婚對象，Kennis豪言：「佢絕對係好老公，諗唔到理由唔嫁佢。」
今日情人節，亦是Kennis與男友樊林爽（Justin）的首個情人節，她特別為男友於Blue Brick Bistro西餐廳安排了浪漫燭光晚餐，甜蜜到暈。Kennis說：「佢人好細心，對朋友又好，同佢一齊好舒服。」Justin亦大讚Kennis說：「佢好好，煮嘢好好食，我同佢人生觀好一致。」
拍拖冇壓力
與身家幾十億的太子女拍拖，Justin可有壓力？他說：「我喺上海一個活動上認識佢，佢客串做模特兒，仲以為佢係模特兒，識咗之後大家都冇問對方做咩，依家都冇咩壓力，我做番自己，靠自己，自信養得起老婆，我係上海人，上海人係好錫老婆。」Kennis即補充說：「上海人係出咗名錫老婆，我喺上海見佢啲男性朋友對太太都好好，咁都有加分。」
有初步計劃
至於異地戀會否難維繫？Kennis說：「如果十年前可能會好多顧慮，緣分要嚟亦冇得諗咁多，雖然相隔兩地，其實我哋互相遷就爭取時間見面，感情仲好。」兩人已成功通過長輩一關，問到是否有結婚打算？Kennis謂應不會今年舉行，繼詐嬌指男友還未求婚，她說：「其實有初步計劃，但仲有好多嘢諗，例如婚後住邊。（認定對方？）佢係我真命天子，同佢拍拖幾個月，覺得佢絕對係好老公，已好有衝動想同佢結婚，冇咩理由唔嫁佢。」Justin冧爆之餘亦回贈說：「我都認定佢係結婚對象，佢係我嘅女神，好靚。」
文：名人組