宣萱收身「翻撻」床戰陶大宇
陶大宇和宣萱這對螢幕情侶在新劇《隱世者們》將演出一場床戲而備受關注，「舊情人」再遇，各自都悉力以赴，其中宣萱更稱要先減肥才上陣，大宇多謝對方的信任，並笑說：「可能佢想畀我好攬啲！」
藝人宣萱昨日出席在清水灣的慈善活動，稱不時與愛犬前來做運動，對於姚子羚日前被愛犬咬傷面部，宣萱稱自己太興奮時亦曾撞傷其下巴：「整傷都冇緊要，等於開心嘅童年一定要面上有疤！」
而正為鄧特希新劇《隱世者們》開工的宣萱，與「舊情人」拍檔陶大宇的親熱戲份備受關注，宣萱稱這場床戲尚未拍攝，但她要先減肥才上陣：「自己過年後肥咗，尋晚開始戒飯，暫時未知劇本寫成點，都要先收一收身。」
對於宣萱表示要減肥「迎戰」，大宇笑言：「女藝人個個都貪靚，其實佢由開工至今都Fit咗好多，呢場床戲點樣拍都未知，不過電視尺度有限，可能佢只係想畀我攬得舒服啲啫，咪當係一股推動力畀自己減肥囉！（你又點準備？）我都瘦咗好多，不過當沖涼照鏡又覺得男人過瘦冇台型唔好，都要食番多啲嘢！（床戲受關注？）我又冇咩壓力，對呢類戲我都好有經驗，我都好多謝宣萱喺一啲訪問中表示對我嘅信任。」
駱應鈞提升官威
另同劇的駱應鈞被大宇大讚愈來愈有男人味，因劇中演高級警司而被指很有「官威」，應鈞笑稱自己當年與大宇演《壹號皇庭》時只是演一名差人，但現在拍《隱》已升了很多級，所以造型和演繹方式都比前收斂。
文：影視組