陳瀅護愛郎 十問九唔答

劉佩玥、馮允謙、張彥博前晚為劇集《一屋老友記》開工，拍攝一場佩玥與允謙拉拉扯扯戲份，兩人於鏡頭前後攬來攬去數十次，最後佩玥喊住走到附近公園，至拍攝近尾聲，佩玥好姊妹陳瀅突然現身，身穿休閒服的她表示湊巧於附近晚膳，獲悉好姊妹在場即走過來探班，兩人甫見面即開心擁作一團，陳瀅還大讚佩玥演技好零NG。

劉佩玥認約伍允龍

與何猷亨熱戀中的陳瀅，透露情人節已約定佩玥：「因為嗰日何雁詩有騷，我哋會拉隊撐姊妹。（咁男友猷亨呢？）唔答啦！（男友情人節有咩表示？）唔答。（情人節淨係陪佩玥同何雁詩？）要支持何雁詩，我上次出騷要唱歌，佢哋都嚟撐我，到時我會準備紮花畀佢，買啲冇咁肥膩嘅朱古力畀劉佩玥。（買咩畀男友？）唔答。」對於與猷亨首次共度情人節，問到她可有特別期望？陳瀅仍保護男友，繼續拿姊妹出來擋駕說：「唔係呀！咪同上年一樣同好姊妹過，好開心佢兩個仲肯受埋我玩。（大家帶埋另一半出嚟玩？）唔會啦，三個女仔都夠。（有男友會sweet啲？）女仔一齊都Sweet啲。」

劉佩玥坐在公園爆喊，獲張彥博遞紙巾安慰。	馮允謙與劉佩玥拍外景時不斷拉拉扯扯。	馮允謙為拍攝效果，與劉佩玥攬抱數十次。

而佩玥對於被指與《城寨英雄》拍檔伍允龍於新春期間撐枱腳，她卻笑謂：「朋友食飯好正常啫。（情人節係咪同伍允龍過？）都話約咗陳瀅咯！」

馮允謙翻撻兩個月

至於與佩玥甚為友好的允謙，就表示劇中也是演回自己，惟一不同的是要講中文對白，他謂：「我真人係中英夾雜，所以有啲難度。（情人節點過？）接咗個商場騷，之後要拍劇，我女友係圈外人，發展得幾好，同G.E.M.只係好朋友啫！（點氹女友？）唔得閒，遲啲食飯睇戲，女友話禮物都唔使送，唔好嘥呢啲錢，我哋識咗好多年，兩個幾月前復合番，佢係好好嘅女仔。」

文：影視組