周麗淇求啱key做非洲新娘都制

周麗淇（Niki）昨日以代言人身份出席Just Gold鎮金店新店開幕活動，並跟品牌主席鄧鉅明與太太兼副主席鄧宣宏雁等一起剪綵，穿上白色露肩連身裙的Niki美麗迷人，大會還安排了一位法國型男即場向Niki跪地送上價值500萬元的6卡鑽戒。

求婚要有傳統象徵

問Niki大會是否真的送她這枚6卡鑽戒？她笑說：「我諗唔會囉，如果係都會喺我啲酬勞度扣。（向你求婚要唔要6卡鑽戒？）係喎！（送呢隻嫁得啦？）唔係話收隻戒指就要嫁嘅，象徵式嘅嘢嚟。（咁要唔要跪地同送戒指？）戒指應該要有，應該係要有啲傳統啲象徵式嘅嘢，不過都係誠意緊要啲，鑽石大粒細粒冇所謂，鍾意個人就得，唔係鍾意隻戒指。跪地就唔一定，我未試過，唔知，但好多朋友都係到嗰刻都冇跪嘅。（低胸法國型男向你跪地尷唔尷尬？）係啦，仲低胸過我，意頭啫，過年開心，係一種祝福嚟，想呢個luck降臨喺我身上。」

周麗淇與鄧鉅明及鄧宣宏雁一起剪綵。

現場有法國型男跪地向Niki送上6卡鑽戒。

任何國籍膚色都得

去年回復單身的Niki被問到可會心急拍拖結婚，她說：「唔急，今年情人節應該會同屋企人過。（冇男仔約？）呢啲時間約會有啲尷尬，如果係有意思先約，冇嘅話我會拒絕，唔好令人誤會，唔鍾意就唔好嘥大家嘅時間。（今年咪lonely情人節？）之前拍拖都試過情人節要工作，唔會介意，做呢行慣咗。」

問到她的小情人（家姐周汶錡兒子Jacques）？Niki說：「佢哋成家飛咗返法國喇！（好似家姐咁識個法國男友？）其實我都好多唔同國籍嘅朋友，我都識得黑人朋友，如果真係鍾意，乜嘢國籍同膚色都冇所謂，溝通到就得，黑人都OK，所以我嘅範圍好闊。（嫁去非洲都得？）都唔錯，非洲好靚o架！」

文：名人組