關心妍佗猴B升CUP報喜

關心妍（Jade）於2009年下嫁金融才俊楊長智，隨即努力造人，可惜過去七年食過多次「詐糊」，終如願以償，現懷有三個半月身孕的Jade已明顯肚凸凸兼上圍升cup，她昨日在微博上載圖文報喜：「Monkey baby coming soon！」今年將生猴B的她在電話中說：「肥咗七磅，預產期係7月尾，開始緊張。」她又否認是人工受孕。

秘方係紅棗水

問到生仔秘方？Jade說：「飲足一年紅棗水，老公就飲馬卡水。（自然分娩？）生到會順產，睇到時情況，頭一、兩個月我嘔得好犀利，當時接咗好多Job唔推得，惟有同唱片公司講腸胃炎。」有喜之後老公一直陪伴在側，Jade說：「知道有咗大家都好開心，因為試過好多次失望同食『詐糊』，屋企人都唔敢講，想穩定啲到三個月先講，媽咪都係三個月先知。」問到「楊B」是否香港製造？Jade大笑說：「應該係，做完去年10月澳門演唱會就開始努力。（老公有咩獎勵？）唔使啦，我應該幫佢生BB。（老公係獨子係咪想生仔？）我同老公想生女，生完女再生仔，可以有家姐照顧。」

關心妍與老公楊長智努力七年，終於造人成功。	關心妍與夫在微博報喜。	好友蔡一智留言恭喜。

胃口變多禁忌

問到現時會否停工作安胎？Jade說：「醫生話頭三個月最辛苦，依家可以做啲舒服嘢。（胃口大轉變？）好鍾意食嘅嘢變成唔鍾意食，好似飲咖啡，依家聞到都想嘔，可以順便戒埋。」記者笑指她現時可以做「大帝」狂點老公做嘢，她表示不會，還透露身邊有不少「懷孕警察」朋友：「已經講好多禁忌我聽。」另外，鄭欣宜、蔡一智、林曉峰及古巨基齊齊送上祝福。

文：音樂組