「發哥嚟嘞！」賀歲檔又有周潤發新戲，迅即成為網民熱話，紛紛翻查發哥的「風流帳」，仲話識睇梗係要睇「發菜」！從影多年的發哥奉旨談情的女星多不勝數，冧女絕招層出不窮，網民激讚發哥識食，仲話要做到發哥呢個package真係唔易！
1979年發哥和嘟嘟在劇集《網中人》一口氣激咀兩分鐘，氣都唔透一啖，呢幕世紀之吻以當時電視尺度嚟講，夠晒震撼！未夠喉？在電影《花城》中點止咀嘴咁簡單，發哥嘟嘟由浴缸玩到上床，發哥仲要背面全裸又露股，激呀！
前港姐冠軍楊雪儀在電影《夢中人》為留住相戀八年的未婚夫發哥，唔想畀林青霞搶走，實行靈與慾留住發哥個人同個身，不惜半裸上陣！多幕纏綿網友話反而「甜度」唔高，多得發哥掌握得恰到好處，夠晒唯美！
發哥和趙雅芝主演劇集《上海灘》，唔使多講，一幕趙雅芝結婚，飾演許文強的發哥衝入教堂大聲嗌唔好，一聲：「程程！」一手拖走又pure又true的趙雅芝，呢招搶婚真係夠勇夠激情！
冧女首要啱feel！發哥在電影《玫瑰的故事》分飾張曼玉的哥哥及情人家明。家明與玫瑰，談情夠晒浪漫唯美，只係蜻蜓點水輕輕一吻，已經觸晒電，less is more！
電影《秋天的童話》中的「船頭尺」發哥絕對唔係高富帥，但口技一流加上夠情深一樣煞食！由之前寸「十三妹」係「茶煲」，到為對方改變自己列出「三大規條五大目標」包括戒煙酒戒賭，加上最後一句「船頭愛茶煲」，唔冧就假！
發哥和鞏俐在電影《滿城盡帶黃金甲》飾演大王及王后，全戲都係大放另類閃光彈，網民講緊嘅係用嘅、着嘅、住嘅都係黃金，加上鞏俐超低胸宮廷服，吸睛度爆燈。兩公婆明爭暗鬥，但行出嚟依然你讓我我讓你，發哥畀晒面鞏俐，忍功一流！