林峯捱義氣 頂替軒仔唔講金
林峯昨日頂替肺炎入院的張敬軒出騷，更未理酬勞邊個袋，非常夠義氣！近日為演唱會操肌的他表示要練到皮薄餡靚，雖然要戒口，但他笑言農曆新年都會照食鮑魚！至於病倒的軒仔昨已出院，今日牛一的他可回家過生日！
藝人林峯及泳兒昨日出席跑步活動記者會，並教台下觀眾做熱身操。受訪時，林峯表示是代流感引發肺炎入院的張敬軒出席活動，他說：「通電話嘅時候知道影響到佢把聲，好慘，希望佢快啲好番。我本身都冇嘢做，淨係做健身。（酬勞邊個袋？）唔知呀，淨係知要嚟做嘢。」至於今日生日的軒仔昨已出院，回家休養。
下廚氹千語BB
林峯近日為4月29日起在紅館舉行的三場《HEART ATTACK LF LIVE IN HK林峯演唱會》積極健身，問到瘦了多少？他說：「我冇磅，但表面睇應該有5磅以上，不過我唔係要輕磅，係想練肌肉線條，要皮薄餡靚，個餡就練緊，個皮就要飲少啲水，因為我易儲水，同埋食嘢要好揀擇。」他又指已叫家人農曆新年不要逼自己吃東西，但笑言可以食鮑魚：「食鮑魚OK，唔係好肥，但唔好太多汁，因為有糖。」
問現時有多少嚿肌肉？林峯說：「個底一直都喺度，但唔明顯。」又笑言演唱會中騷肌的程度視乎健身成果：「同埋應該會好熱，除吓衫冇所謂！」講到情人節，林峯透露正構思怎樣與女友吳千語慶祝，不排除會下廚冧女友。
泳兒男友愛手指運動
屆時會參加4公里賽事的泳兒被問可會捉男友一起參加？她笑說：「佢鍾意嘅運動同我嘅唔同，佢鍾意手指運動，即係打機，我哋唯一一齊做嘅運動就係去沙灘。」她又指4月會在港參加十公里長跑賽事，希望能破個人紀錄。可會叫體弱的軒仔多跑步？泳兒說：「如果佢好番運動係一定要。」又謂新一年希望大家身體健康，特別是仍住院的母親可盡快康復。
文：音樂組
攝：秦健輝