十場騷唔見千萬 夏森美：後會有「琪」
謝安琪（Kay）經理人夏森美，對於Kay曾為暫停逾十場內地騷而喊爆，他昨日接受電話訪問表示：「其實Kay喊係因為覺得對內地粉絲唔住，兌現唔到內地開巡唱嘅承諾，絕唔係因為賺少咗。我哋都希望佢喺和諧嘅環境下同內地歌迷見面，唔係怕某啲人，只係唔想引起不必要嘅矛盾，覺得有啲事一定有過去嘅一日。」
夏森美強調內地巡唱只是暫延而非「被取消」，故毋須向主辦單位賠償：「我哋同有關單位有共識，佢哋都同意。（逾十場內地騷賺少千萬港幣？）都係。（4月後又休息咪再賺少千萬？）可以咁講，其實最近有內地、澳洲同東南亞主辦單位都搵我哋喺暑期開巡唱，但阿Kay真係要休息，所以唔做住，等明年後再決定，不過Kay迷唔使擔心，因為佢放完假一定後會有『琪』。」